[walaa farouk]

• ممكن تركزوا معايا لحظة
رغم كل الأصدقاء اللي حواليه وحيد !
ورغم إنها بتضحك لكن مليانة جروح !..

عشان كدة .. متستهونوش بحد بيشتكي ليكم ،
ساعات الواحد بيبقي بيدوّر علي حد يحس بيه وينقذه !
وأوعوا تحكموا علي حد من صوره وحياته اللي من برة ..
انتوا مش بتحسّوا باللي بيحصل جواه ..!

كلنا - ومفيش حد فينا - معندهوش مشاكل في حياته ،
لكن .. لازم نتعلم نسمع بعض !
ممكن تلاقي حد بيكلمك بالليل يقولك "إزيك" ..
وهو قصده "انا تعبان وعايز اتكلم" !
ممكن تلاقي الواحد مليان جروح
وانت عمّال تزود فيه جروح أكتر ومش واخد بالك !
ياما ناس ملقتش اللي يسمعها
وفجاة مبقوش معاكم في الحياة !

فيه رجال كتير متربين علي انهم عيب يقولوا "تعبانين"
وعيب يقولوا انهم "مجروحين ومكسورين"..
اتربوا علي كدة .. ان الراجل "ميّعيطش"
لا يا جماعة .. سيبوه يعيّط ، سيبوه يطّلع اللي جواه

احنا اخترعنا مصطلح strong independent woman
مع ان الـ woman مش كل الأوقات strong خالص
هي بتين دة للمجتمع لكن من جواها مليان هموم وجروح

للأسف متربيين في مجتمع انك ممنوع تشتكي
حتي لو علي كتافك هموم الدنيا ..
وعلي فكرة ..
ضغوط الحياة وزنها مش متساوي علي الجميع
بس مرة اشيل عنك ومرة هتشيل عني
احنا لازم نشيل بعض ونقف جنب بعض !

اوعي لو جواك تعبان متتكلمش.. اتكلم وفضفض !
مش عيب انك تفضفض ومش عيب انك تسمع !
وللأسف وصلنا من الغرور اننا عرفنا اننا فاهمين بعض ..
احنا في الحقيقة مبقناش عارفين ولا فاهمين بعض
احنا فاهمين ان الصورة الذهنية للشكل هي نفسها من الداخل

اللي قاعد معاك علي كافيه وبيضحك هتلاقي جواه جرح ملتهب
اللي معاكي في شوبنج وبتضحك هتلاقيها مطعونة جواها
اللي معاكم في الشغل وعاملين نفسهم كويسين هما مضغوطين وتعبانين

لو حد قالك انا تعبان اسمعله حتي لو مش بتحبه !
ولو انت مليان جروح وهموم اتكلم ومتخافش ومتتكسفش !
لأن ربنا اوقات كتير بيطمنك من خلال ناس هو بعتها ليك
لأن ربنا اوقات كتير بيتكلم علي لسان ناس حلوة تريحك وتشيل عنك