[walaa farouk]

كانت لحظات مرعبة وأنا راكب جنب واحد صاحبي
جاب عربية لأول مرة 🚗 "وبيدّعي" أنه بيعرف يسوق!!
صرخات خرجت مني زي "حاسب هنخبط" "استنى استنى مش هتجيبك" "خللي بالك من يمينك" 😱 مكملتش دقيقة عشان أطلب منه أنه يقف وينزلني، أو يسيبني أسوق أنا!! ومع فشل محاولاته لإقناعي أنه يوصلني، طلع بثقة رخصة القيادة بتاعته "اللي استخرجها بدون امتحان طبعا"، كإثبات أنه بيعرف يسوق وأن خوفي ده ملوش مبرر والدليل "الرخصة" ..
الموقف ده خلاني أنتبه هو ليه أنا مش باخاف كده وأنا راكب جنب حد تاني "أنا عارف" أنه بيسوق كويس!! زي أبويا مثلا!!
أبويا .. أنا "عارفه" كويس وعارف قدراته.
أبويا .. "أشطر" حد أعرفه بيسوق في حياتي، عمري مافكرت أشوف رخصته عشان اطمن!!
أبويا .. اللي ياما أخدنا "مشواير" مع بعض وبنوصل بالسلامة🥰
أبويا .. اللي مش محتاج انبهه "هتعرف تدخل في الحتة الضيقة" أو "حاسب يمينك" أو اي نصيحة عشان يعرف "يتصرف" ..
أبويا .. اللي ممكن "أنام وأنا جنبه" ولا في دماغي أي حاجة خالص!!😴
وبمنطق مشابه في بداية يومي بارفع عيني علي أبويا اللي فوق!! أبويا اللي كتير بانسى أن ه جنبي في كل طريقي .. بامسك فيه تعال أنت "قود حياتي" وامشي بيا👨‍👦
في ارميا 31 : 34 مكتوب كده "اعرفوا الرب" ..
عشان كده باجي بفخر أقولك:
أنا "عارفك" كويس .. وياما أخدنا "مشواير" مع بعض .
. أنت مش محتاج أي نصيحة مني عشان "تتصرف"
.. أنت "أشطر" حد أعرفه في حياتي كلها ..
المشوار طويل وصعب لكن من كتر ما أنا "عارف" قدراتك
، أنا جنبك "نايم في سلام" .. معاك أنا مطمن ..