[walaa farouk]

مبروك انضمامك الي شهداء اقباط مصر الجبابرة..
اصبحت فوق كل القديسين و الرهبان و البطاركة و النساك ،
و اصبح اسمك يذكر مع عظماء الشهداء مارجرجس و مارمينا و فيلوباتير ..

اصبحت صفحة خالدة ، تاريخ شهدائنا، اللي من كتر استشهادهم
وصل فيه الدم في عصورهم القديمة لركب الخيل ..

رفعت راسنا ، و بقيت فخرنا احنا الاقباط شافوا الذل من يومهم ، اللي عيرونا بلقب "ملة الزيت"
من كتر ما كنا بنصوم لربنا ، و "كوفتس" سخرية من كلمة قبطي ،
و "عضمة زرقاء" من يوم ما لبسونا صلبان حديد في رقبتنا لحد ما عضمة رقبتنا ازرقت وبقى ده لقبنا ..

رفعت رأس الاقباط و كملت تاريخهم ، اجدادنا اللي كانوا بيجروا علي ولاة الرومان
و لما ما يلاقوش سيوف ، كانوا بيدوهم فؤوسهم بنفسهم علشان يستشهدوا بيها علي إيمانهم..

كملت باستشهادك فخرنا ، احنا لللي اتحاربنا طول عمرنا
، احنا اللي دقيناه علي ايدين اولادنا علشان لو استشهدنا و حبوا يفنوا ايماننا ،
يعرف انه مسيحي لما يكبر ..

رفعت رأس الاقباط الجبابرة اللي استحملوا ما لا يطيق احد من المر و المرار ،
و مع ذلك خدموا بلادهم بكل أمانة و لم يخرج منهم و لا قاتل او حاقد او كاره ..

كملت تاريخنا يا بطل ، و اكدت حتي في استشهادك اننا بنحب مصر بلدنا مهما كان
، و بندعو بالغفران علي اللي قتلوك زي ما كل اجدادنا دعوا بالغفران للي اهانونا و قتلونا ..

كتبت بدماءك تاريخ حبنا ، و كملت سيرة أجدادنا اللي استشهدوا بالالاف في مصرنا الغالية ،
و اللي ح نفضل فيها بنحبها و نحب كل اخوتنا اللي قلبهم عامر بالحب مش زي القلة
اللي زي قاتلك عديم الرحمة و الحب ..

ابونا الغالي ، سيدفن قاتلوك في التراب و تموت سيرتهم و ينالوا جزاءهم ،
و ستحلق روحك فوق السحاب مع الملائكة و الأبرار و الشهداء و تنال قمة الكرامة امام الله ..

ابونا الغالي ، انت بلغت اللي فاكر ان احنا بنخاف ، ان زغاريد الاقباط يوم وداعك
و فرحة الاقباط باستشادك لا تدانيها اي فرحة ، لانها اسرع رحلة لاكاليل المجد ..

انت القوة و الجبروت و العظمة و الكرامة ،
و اللي موتك مع اللي شمت في موتك (غفر الله لهم ) سيقفون امام عدل الله .