[walaa farouk]

الكتاب المقدس اتكلم مرات كتير عن الصوم،
ووصفه بإنه فعل عبادة بيمارسه الشخص لأجل هدف معين
فالصوم في حد ذاته مش هدف لكنه وسيلة..
علشان كده مينفعش الصوم يكون انقطاع عن الأكل بس،
أو تغيير لنوع الأكل اللي بناكله..
لكن لازم يكون مربوط بأمر تاني مهم،
فبنشوف الله بيأمر شعبه في سفر يوئيل
إنهم يتوبوا ويرجعوا له..
وبيقولهم إنهم يربطوا توبتهم دي بالصوم والبكاء (يؤ2: 12)
وده اللي عمله شعب نينوى
لما صاموا وطلبوا رحمة وغفران من ربنا (يو3)
وكمان بنشوف دانيال النبي
وهو بيصلي ويتشفع لأجل شعبه في السبي..
وبيربط صلاته دي بالصوم والبكاء قدام الله (دا9: 3)
وفي بداية العهد الجديد بنقرا عن حنة النبية..
اللي كانت مقيمة في الهيكل وعابدة بأصوام وطلبات،
ومستنية فداء أورشليم اللي وعد بيه الله (لو2: 36-38)
والسيد المسيح نفسه صام 40 يوم وليلة
قبل ما يبدأ خدمته (مت4: 2)..
وبعد صعود المسيح للسماء التلاميذ صاموا أكتر من مرة،
وصومهم كان مربوط دايماً بالخدمة في الكنيسة (أع13: 1-3)
نفهم من كل ده إن الصوم ممارسة روحية مهمة جداً..
لكنه مش هدف في حد ذاته..
لكنه بيشجعنا على التوبة والعلاقة مع الله بشكل أفضل،
اتشجع إنك تاخد أوقات صوم في حياتك الروحية..
لكن خلي بالك إن في وقت الصوم ده
يتحول لهدف مش وسيلة..