[walaa farouk]

داود لما ضعف راح اختلي بنفسه و كتب في مزاميره : " إلي متي يارب تنساني " رغم ان الله مش بينسي حد ، و كتب " إن أنا وحيد و بائس " رغم انه ملك و حواليه عزوة ..

إيليا لما ضعف قال لربنا
" خذ نفسي لان لست خيرا من أبائي "

بولس أعظم كارز لرجاء الأمم
لما تعب كتب كدة " تثقلنا جدا فوق الطاقة " و كتب كمان اننا " متحيرين لكن غير يائسين ، مكتئبين لكن غير متضايقين "

الكتاب المقدس بيعلمنا رسالة صحية جدا للنفس .. إن لما تتألم في أوقات ليلك و ضعفك مش عيب أبدا تعبر عن ده .. و علماء النفس بينصحوا ان بإستمرار تعبر عن اللي جواك سواء بالكتابة أو بالكلام و الحديث مع شخص او انك تحوله لصلوات و صراخ ..

لكن معظمنا بيتظاهر بالقوة و بيخجل من اعلان آلامه و مخاوفه خوفا من مظهره قصاد الناس او شماتة حد فيه أو انه يتقال عليه ده بعيد عن ربنا ففقد رجاؤه ، فبتكون النتيجة هي كبت نفسي و ان الانسان يكون مش حقيقي في مشاعره يكون جواه شئ و براه شئ تاني .

ياريت نتعلم نعبر بإستمرار عن الصراع اللي جوانا بأدب و رقي مع الله و الناس بأي طريقة تشوفها مناسبة ، و أوعدك ده هيكون مفيدا جدا لصحتك النفسية .

( بشرط ان ده ميكونش إتجاه دائم و تتحول لشخص واخد موقف من الحياة )