[بشرى النهيسى]

الخوف الشافي .. د.مجدي إسحق
منطق الهي فائق العجب ، إنه يسيب اللي مخوفك يحصل لغاية لما يشفيك من أي خوف ..
ده بيحصل في علاج اسمه "الشفاء بالمواجهة" ، انك تحط المريض في مواجهه اللي مخوفه، فتداوي "الداء بالداء" .. النتيجة انه يتشفي من جواه ، فيبطل يخاف مش بس من اللي عنده ، من اي خوف و كل خوف ..
كده ربنا اتعامل مع موسي ، لما خاف من فرعون و هرب منه (خروج ٢) .. قوم ربنا يسيب السنين تلف ، و يصمم -تبارك اسمه - يبعته بعد ٤٠ سنة لفرعون (و ده بالمناسبة واحد تاني اعنف من اللي قبله) ..
حاول موسي الخايف انه يعتذر ٥ مرات (راجع خروج ٣ و ٤) ، و ربنا ما قبلش الاعتذار ..
هنا راح موسي (الخايف) وواجه فرعون ١٠ مرات ، وفي المرة ال١١ ، كانت مواجهة دموية معاه علي البحر، و هناك غرق فرعون مع كل جيوشه، و غرق معاه خوف موسي للأبد !!
لما تلاقي ربنا مصمم (في حكمته) انه يسيب اللي مخوفك ، أعرف أنه بيعالج خوفك ، يعلمك المواجهة ، و الإيمان و الصلاة و استدعاء الوعود الإلهية..
و أثناء كده بتخف من اللي مخوفك ، و تكتشف أن الخوف بينزل من عقلك لتحت رجليك ..
كان ممكن ربنا يقضي علي العدو من اول يوم ، لكنه عاوز ولاده مطمنين لقوته حتي من غير ما المشاكل تروح ..
ربنا عاوزنا اسود من قبل ما نغلب في الحرب ، و الاسود لا تخاف !!