[walaa farouk]

وأنت بتكبر كده والحياة بتأثر فيك هتتعلم كتير ..
هتتعلم إن مش كل حاجة حلوه لازم تدوم ..
هتتعلم إن في ناس هتكون مراحل في حياتك هتيجي لغرض يعلمه الله وهتمشي ..
هتتعلم مين اللي تبكي على كتفه وهتتعلم إن ساعات لازم تمسح دموعك بإيدك..

هتتعلم تحب وهتتعلم تفارق وتفقد جزء من روحك وتكمل..
هتتعلم من الناس اللي جرحتك وهتتعلم من اللي أنت جرحتهم..
وهتشوف الدنيا وهي بتدور وتعلمك إن الشيء الوحيد الأكيد إن مفيش حال بيدوم..

هتتعلم يعني إيه ثقة ويعني إيه جدعنه، ودي هتبانلك وقت شدتك ومن أقرب أصحابك ..
هتتعلم إنك لسه قدامك كتير ولازم تفضل تربي نفسك..
وكل ما تتعلم ، هتدرك إنك أمام علم الله قليل جدًا..

هتتعلم إن في ناس في حياتك مينفعش تسيبها لازم تتبت فيهم بإيدك وسنانك علشان الناس دي مبتتعوضش..
وهتتعلم إنك ساعات لازم تفسح الطريق للي عايز يمشي..
وأنت قلبك راضي وماشي في سكتك..

هتتعلم من الأحياء وهتتعلم من الأموات..
هتتعلم من العالم وهتتعلم من الجاهل..
هتتعلم من راجل مسن وهتتعلم من طفل صغير..
هتتعلم من تجارب اللي حواليك ولكن هتتعلم أكتر في نفسك..

ومن أكبر الحاجات اللي لازم تتعلمها إنك تسامح نفسك وتسامح اللي حواليك..
وتتعلم إن أكبر كنز لك هي أعمالك الخالصة لله..
وإن كان اتكتب عليك تعافر..ف ربنا يكتب لك إنك تعافر في السكة الصح ومع الناس الصح وعلشان الهدف الصح...
Cpd