[walaa farouk]

لا تسرق ، الوصية التامنة في الوصايا العشر (خروج ٢٠) ،
جت ٧ مرات في كلمة الله ..

ليه اخترت اتكلم عنها ؟؟ لأنها موجودة في قايمة الناس
اللي مش ح يرثوا ملكوت الله .. (١ كورنثوس ٦) ..

للدرجة دي ؟؟ السرقة تحرم من السما؟؟

اصل الكلام مش بس عن سرقة الفلوس و الممتلكات،
بالاكتر عن سرقة أخطر و اعنف، سرقة ممكن تقتل
و تبقي اشد من القتل ، اسمها "سرقة الفرح" ..

سارق الفرح اللي بيشتم حد و يشهر بيه و يفضحه مهما كان
(حتي بفرض ان عنده حق) ، يبقي قاتل نفس ،
سمح لنفسه يحرم انسان من ضحكته و يحرمه من راحة باله و ينيمه مقهور و مكسور .. يعاتب ، يواجه بينه و بينه،
إنما يبهدل حد و يحطمه و يفضحه ده اشد من القتل ..

سارق الفرح اللي بيسيب حد وراه زعلان منه و عرف انه زعلان ، و ما كلفش نفسه يجبر بخاطره و لو برسالة أو حتي بتليفون..

سارق الفرح اللي طول الوقت يتعب اللي حواليه و ينكد عليهم ،
شريك حياته، ولاده ، أصحابه، جيرانه،
زمايله اللي بيشتغلوا معاه أو عنده ؛ يتفنن في تلقيح الكلام و تكسير المجاديف ، و كسر النفس و المقارنة و التجاوز..

سارق الفرح اللي لما يلاقي ناس مبسوطة لازم يعكنن عليهم .
. يضلم الدنيا قدامهم، و يسود لهم المستقبل..
او ياخد القاعدة لحسابه، و يتخانق علي اقل حاجة و كل حاجة.. ما بيعحبوش العجب، و طول الوقت زعال علي بطال..

اللي يلاقي حرامي من دول يبلغ عنه السما بسرعة و يصلي له ربنا يشفي مشاعره المريضة!!

و نصيحتي لغاية لما الملايكة تحقق في البلاغ
و نعمة ربنا تتدخل، ابعد عنه بحكمة (علي قد ما تقدر)
، لأنه حرامي محترف، بيعرف يسرق ضحكتك حتي و انت واخد بالك !!