[walaa farouk]

ربنا يوقف لك ولاد الحلال.

دعوة روعة اتربينا عليها من اهالينا ..

اصل ولاد الحلال دول سر بركة العمر كله ..

ابن الحلال ده اللي يطلع لك و انت بتفكر في مشكلة ،
من جيرانك أو زمايلك أو اصحابك أو حتي في اي مصلحة أو شغل .. تلاقيه جنبك من غير ما تطلب ،
و يتطوع يلبي لك طلبك من غير اي مقابل ..

مش بس كده تلاقيه اخد الموضوع كله علي قلبه ،
و يعمله و هو فرحان، و فوق البيعة يطمنك كمان انه خلصه..

و اذا كان ابن الحرام ده زي ما بيقولوا "
معجون بمية العفاريت" ، ابن الحلال ده بيبقي "
معجون بمية الملايكة" ..

حتة سكرة ماشية علي رجلين ، داير في كل حتة يريح الكل
، و يخدم الكل و هو في كامل السعادة ..
منين ما يروح بلسم، كلامه دوا و ضحكته شفا و قعدته هَنا ..

ابن الحلال ده يخفف عنك همك ، و يتسابق علي راحتك و يخفف عنك حتي وسط تعبه .. من قبل ما تطلب يحس بيك و يعمل لك الخير ..
تحس معاه انه اقرب لك من حد من دمك و لحمك ، اقرب من حتي اخوك ..

و تسأل نفسك ، منين جاب القلب ده و الحب ده
و التفاني ده و ما تعرفش اجابة غير انه من حتة من طعم السما ..

من كتر ما اتصدمت في غدر الناس تستغربه ، و من كتر حبه تبقي مش مصدق ان فيه ناس كده ، و انه مش معقول ما لوش اي غرض غير راحتك و سعادتك و بس !!

ابن الحلال لو لقيته يبقي رزق ما بعده رزق ، و ساعتها تدعي لغيرك و بالذات للي سبق و دعالك "ربنا يوقف لك ولاد الحلال" ..