[walaa farouk]

في كامل حكمته و قدرته و محبته ،
فيه حاجات ربنا اختص بيها نفسه ..
سايبنا نجرب لوحدنا لغاية ما "نفلس"
و نعترف انه مش بايدينا، و نقول ان "الله حق" !!

و الهدف مش انه "يعجزنا" و لا "يعايرنا بضعفنا" ..
الهدف في الآية الخالدة : "توضع عينا تشامخ الإنسان.. (إشعياء ٢: ١١) ..

هنا يجي دور الصلاة الجميلة : " يا إلهنا أما تقضي عليهم، لأنه ليس فينا قوة أمام هذا الجمهور الكثير الآتي علينا، ونحن لا نعلم ماذا نعمل ولكن نحوك أعيننا ".. (أخبار الأيام الثاني ٢٠: ١٢) ..

من اجمل القصص موسي ..

سابه يجرب بايديه لغاية ما داق فشله بنفسه ،
و قتل المصري و بسبب اندفاعه هرب ٤٠ سنة ..

كان متعلم كل حكمة المصريين ، لكن ما نفعتش ..
و لما كبر كمل رحلته و هو عارف ان الله يملك المستحيل :
هو اللي يعرف يشق البحر أمامه فيعدي بسلام ،
و هو اللي يعرف يقفله فيغرق فرعون و كل جيشه..
هو اللي اطعمه مع ٢ مليون واحد مَن و سلوي من السماء
و روي عطشهم بماء من الصخر ، هو اللي قاده في البرية مع الملايين وسط دروب الصحرا من بعامود السحاب نهارا و عامود النار مساءً ..

و دي قصة حياتي و حياتك ..

لكن عارف الاحلي من كده مش انك تسيب لربنا الحاجات
اللي تخصه بس ، حتي اللي تخصك و تقدر انت عليها سلمهاله
، لأن من كمال احترامه لحريتك انه مش ح يعمل اي حاجة من غير ما تطلب منه (!!) ..

حتي بابك المقفول بيستأذن (عفوا)
و يخبط عليه علشان يسيبك انت اللي تفتح (رؤيا ٣ : ٢٠) ..

و يا بخت الإنسان اللي بيقول لربنا "اتولاني"
مش بس في عدم إمكانياتي، كمان حتي في عز إمكانياتي ..

و لا ايه رايك ؟؟