[walaa farouk]

الحلاوة دي نعمة ربانية ، مع قلب امين مجتهد صافي ابيض ، بيحب و يسامح و يدي من غير مقابل ..

الحلاوة مش بس في الشكل ، لأن ياما ناس زي القمر بس مالهاش قبول و لا طلة و لا حضور ، و ناس متواضعة الشكل بس من حلاوة روحها ، زي القمر ، تحبها و تحب كلامها و قعدتها و ضحكتها و فرحتها و حتي زعلها و عتابها..

الحلو حلو في كل حاجة ، كلامه متنقي، علشان ما يسيبش حد زعلان لا قدامه و لا وراه..

ضحكته صافية زي نيته ، و قعدته مريحة و مفرحة ..

صوته نفسه حلو ، نغم شايل سعادة و رقة و طيبة ، كأنك بتسمع احلي لحن في الوجود ..

عينه حلوة قوي ، مش لانها ملونة لانها شايلة كل الطيبة و الامانة و الإخلاص اللي جواه ، زي ما الكتاب وصف داود
"حلاوة العينين".. (صموئيل الأول ١٦: ١٢) و زى ما قال السيد المسيح عن "العين البسيطة" اللي بتنور الجسد كله (متي ٦ : ٢٢) ..

حتي "زعله حلو" و "عتابه حلو" ، يعتذرلك حتي و هو مش غلطان ، و لو حب يلفت نظرك يقولك "انا عارف انه مش قصدك" ، سهل فوي تراضيه لان جواه قلب طفل، و بيتراضي باقل كلمة حلوة ..

حتي "طلباته حلوة" ، لا يحرجك و لا يجرحك حتي لو كان أكبر منك سنا أو مقاما أو منصبا.. يستأذن بأدب جم و احترام ، و لو مش انك راضي أو متعذر هو اللي يسبّق و يعفيك، و لو قبلت يتأكد انك مش مجبور و لا مقهور و لا مكسوف و يشيلك الجميل طول عمره ..

من حلاوته عاوز يرضي كل الناس و ييجي علي نفسه علشان يريح الكل ..

الحلو ده موجود و هو غايب عنك ، تغمض عينيك تشوفه قدامك، تيجي سيرته قلبك يرقص من جمال خصاله و تبقي مش عاوز تبطل كلام عنه ..

الحلو ده من انعامات الله علي الوجود ، هو اللي بيخللي الناس حلوة و الدنيا حلوة و كل حاجة حلوة ..