[walaa farouk]

عقل منور ، متوصل بشركة الكهرباء السماوية مباشرة ..

نعمة غالية قوي بيديها ربنا للطيبين الشاكرين الراضيين..
عطية و سكيب فياض علي العقل انه يفكر صح و ياخد قراراته صح و بسرعة و بتوازن و بحكمة مدهشة ..

وقت المشاكل ما يرتبكش، ووقت القرار ما يتلخبطش ..

عقله صافي لان ضميره صافي ، و قراراته صائبة لان ذهنه مش مرتبك بالغل و الأنانية و المصلحة و الغيرة و الكره و الحسد ..
من حبه لربنا و للناس ، و من كتر اخلاصه و صفاء نيته ، عقله منور و شبعان حكمة ..

و تبان حكمته في اصغر موقف زي أكبر موقف ، في الشغل ، البيت، الخدمة ، الحياة اليومية ، العلاقة مع الناس ..

و علي فكرة الموضوع مالوش علاقة بالثقافة و لا التعليم .. يعني ممكن يكون بسيط و احكم من العالم ، لأن نور ربنا السماوى منور عقله و مبارك عمله ..

العقل المنور ده متواضع قوي ، بيصلي كتير قبل كل عمل، و يسأل و يستشير كل ما يقدر ، و لو ما لقاش حد بيصلي كتير قبل كل عمل فربنا بيرشده و يزيده نور علي نور ..

و ربنا يكفيك شر العقل لما "يضلم" .. تلاقيه يشوف الغلط صح و الصح غلط ..و تلاقيه يجري للحفرة برجليه و هو شايفها و مقتنع بيها ، و حتي لما يقع فيها رغم كل التحذيرات ما يعترفش بغلطه .. و لو صادف و طلع منها ، يروحلها تاني و ياخد معاه فيها كل اللي حواليه ..

العقل المنور نعمة ما بعدها نعمة ..

و ما أجمل كلمات الله :" لأن عندك ينبوع الحياة. بنورك نرى نورا" (مزمور ٣٦: ٩)