[walaa farouk]

بنشوف أحيانا حالات بيشتكوا ان اب الاعتراف بيعنفهم نتيجة ادمانات معينة في حياتهم .. اخرهم حد قال ان ابونا بكل عنف قاله لو فضلت كدة وماتوبتش هتترمي في جهنم .

ليا عدة ملاحظات :
• اولا المسيح عمره ما استعمل الطريقة دي مع الخطاة ، لكن كان بيديهم دايما رجاء و أمل و حب .
• المسيح كان عارف يفرق ان دول ضعفاء مش اشرار بمعني انهم مغلوبين و محتاجين قوة .
• معني انه جاي لحد عندك وبيخبط علي بابك يستنجد بيك ، يعني نفسه انه يتغير .
• و دعوة المسيح دايما من يقبل الي لا اخرجه خارجا يعني مش هحسسه بالرفض .
• الطريقة دي هتوصل له بطريقة غير مباشرة .. ان مفيش أمل و رفض من الله لانه في الغالب مش عنده النضج والادراك الكافي والطريقة دي مش هترجعه بل بالعكس هتخليه يهرب اكتر لادمانه لانه جرب يهرب لحضن الله والكنيسة زي ما سمع ولقي ان مفيش فايدة .
• مش عيب لو اكتشفت اني مش قادر اساعده ، اني احوله لخدام متخصصين في مجالات الادمان يساعدوه افضل مني .
• واخيرا هو قد يكون مغلوب من نوعية الادمان دي ، و اب الاعتراف ممكن يكون مغلوب من محبة المال او حتة تانية ، القصد ان كل حد فينا عنده حتة بيصارع فيها .

أخيرا .. المسيح لم يقسو علي الخطاة الضعفاء بل كان اسلوبه حازما وقاسيا علي المستكبرين حتي لو كانوا رجال دين .. اتمني ان لاباء الاعتراف الوعي والنضج الكافي ليقودوا حياة ملايين الشباب للافضل مع المسيح .