[walaa farouk]

شكرا




كلمة ليست ببسيطة اطلاقآ
و لا تعتبر من الكلمات العابرة
دي المفروض تكون في كل كلامنا
كلمة لها قوة جبارة .. بتدخل تخاطب العقل و القلب و كل الاماكن الموجوعة عندك .. كأنك بتطيب جرح مثلا.
ببساطة اي حد بيعملنا خدمة و لو شايف انها بسيطة لازم تقوله شكرا ..
بتاع سندوتشات الفول و انت بتاخدها منه تقوله شكرا ..
الست بتاعت الخضار بعد ما تخلص و تنقي و توجع قلبها علشان ٢٠ج تقولها شكرا..
السايس اللي بيمسح عربيتك تقوله شكرا ..
العسكري اللي في الطريق و هو بيفتحلك الكمين
و بتعدي قوله شكرا ..
عامل النظافة في الشغل او البيت قوله شكرا..
صاحبك اللي تعب معاك قوله شكرا..
ابوك او امك او اخواتك قولهم شكرا..
المدرس اللي بيشرحلك تقوله شكرا..
زوجك / زوجتك بعد ما تقدملك حاجة تقولوا شكرا..
الموظف او الدكتور اللي قدملك خدمة تقوله شكرا..
الاب الكاهن اللي بيسمعك و يعلمك تقوله شكرا..
مديونين بكام شكرا لناس كتير بقينا ناخد منهم
علي اساس انه واجبهم و بدون كلمة شكر ..
السيد المسيح تعجب من ابرص واحد يشكر بعد شفاء عشرة من البرص ..
وَفِيمَا هُمْ مُنْطَلِقُونَ طَهَرُوا فَوَاحِدٌ مِنْهُمْ لَمَّا رَأَى أَنَّهُ شُفِيَ
، رَجَعَ يُمَجِّدُ اللهَ بِصَوْتٍ عَظِيمٍ، وَخَرَّ عَلَى وَجْهِهِ عِنْدَ رِجْلَيْهِ شَاكِرًا لَهُ،
وَكَانَ سَامِرِيًّا. فَأجَابَ يَسُوعُ وَقَالَ: «أَلَيْسَ الْعَشَرَةُ قَدْ طَهَرُوا؟ فَأَيْنَ التِّسْعَةُ؟ أَلَمْ يُوجَدْ مَنْ يَرْجِعُ لِيُعْطِيَ مَجْدًا للهِ غَيْرُ هذَا الْغَرِيبِ الْجِنْسِ؟» لوقا 17
اتعلموا الشكر .. لان الشكر حياة ..
فاللي بيشكر الناس .. اكيد بيشكر ربنا في حياته.
نشكرك علي كل حال و من اجل كل حال و في كل حال
و معلمنا بولس الرسول يقول ..
"شَاكِرِينَ كُلَّ حِينٍ عَلَى كُلِّ شَيْءٍ فِي اسْمِ رَبِّنَا يَسُوعَ الْمَسِيحِ، للهِ وَالآبِ." (أف 5 : 20)
يا تري هتشكروا مين النهاردة ؟