[walaa farouk]

ثوك تى تى جوم نيم بى أوؤو ... نيم بى اسمو ...
نيم بى آماهى شا اينيه . أمين .
* ايه القلبان ده بس ما كنا حلوين و مصهللين الصبح ..
مالها قلبت نكد ليه كدا 👀 و ايه يا عم الرايات السودا دى .. و ايه ألى نزل الشمامسة من مكانها .. بينضفوا الخورس علشان العيد ولا ايه 🤔
براحة بس كدا و تعالى انا هفهمك كل حاجة ... 😌😉
اولا يا سيدى .. الكنيسة بتبتدى صلوات البصخة من اول يوم احد الشعانين ( ليلة الاثنين ) .. كلمة بصخة اصلا
كلمة عبرية معناها ( فصح او عبور ) .
*طب ايه هنعبر منين ولا هنروح فين 👀
تعالى نجيب الموضوع من اوله خالص بقى و ركز معايا كدا
عارف خروف الفصح 🤔 .. اكيد عارفه ان شاء الله 😂 ..
عيد الفصح ده اصلا عيد يهودى
كان بيتم فيه ذبح خروف بقواعد و طريقة احتفال معينة ..
و العيد ده ابتدى من أرض مصر قبل ما شعب بنى اسرائيل يخرج مع موسى لأرض الموعد ...
و خروف الفصح ده كان إشارة و رمز لذبيحة الصليب ... 😉
يبقى احنا عندنا دلوقتى رمز ( خروف الفصح )
و المرموز إليه( السيد المسيح ) ..
تعالوا نقول شوية صفات كدا اتقالت عن خروف الفصح
و اتحققت بالفعل فى السيد المسيح ⁦🙋🏻‍♂️⁩😉
لما جه موسى يقولهم مواصفات الخروف قالهم كذا صفة كدا .. زى
١- ذكرا حوليًا بلا عيب ( عنده سنة بمعنى يكون شاب يعنى مش صغير ) : و المسيح كان فى سن الشبب و بلا عيب او خطية
٢- يكون تحت الحفظ فى البيت من يوم ١٠ إلى يوم ١٤ من شهر نيسان : المسيح قعد فى أورشليم نفس المدة و مات فى نفس ميعاد ذبح خروف الفصح👌
٣ - يتاكل من غير ما تتكسر عظمة منه :
و ده اتحقق مع المسيح لما كسروا ركبة اللصين علشان يموتوا و جم للمسيح لقوه مات فمتكسرش ركبته .. 😉👌
٤ - خروف الفصح كان سبب ان ميهلكش ولا واحد من بنى إسرائيل فى ضربة موت الأبكار ألى اتضرب بيها المصريين ...
السيد المسيح سبب ان ميهلكش اى حد يؤمن بيه بل تكون له الحياة الأبدية ⁦❤️⁩
فاذا البصخة هى عبور مع المسيح بصليبه من الظلمة إلى النور ⁦❤️⁩
دم الخروف كان علامة بيوت بنى اسرائيل فى وسط أرض مصر ... و الصليب هو علامة المسيحيين و دم المسيح هو سبب خلاصهم من ابليس ⁦❤️⁩
كدا احنا عرفنا سبب تسمية الاسبوع ده ب ( البصخة )