[walaa farouk]

يا ما عرض مخبي ورا المكسب اضرار ، و ياما شرور مستخبية ورا النجاح..

و لأن الإنسان "ابن مصلحته" ، يجري ورا المكسب ، و ينخدع من كل اغراء..

ترقية لمنصب أو شغلانة ربحها كتير تتعرض عليك ، فتوافق من غير تردد ..
و بعدين تكتشف انها بلعت وقتك و حرمتك من راحتك و كلت صحتك ،
و عطلت خدمتك و صلواتك و عبادتك..

بنت جميلة شدت انتباهك أو ولد كلامه "ناعم" لفت نظرك ..
و من غير ما تصلي و لا تستشير و لا توزن الأمور تندفع في علاقة عواطف نارية
، و بعدين تكتشف أن الحلاوة و النعومة مخبية وراها عِند و تسلط
و عدم التزام و ملاوعة و كذب و خداع .. و فين علي ما تفوق
تكون بعترت مشاعرك و جرحت قلبك و كسرت نفسيتك ..

الدرس : اي نجاح في المناصب و الفلوس او المشاعر او حتي الخدمة نفسها
ما تقبلوش الا بعض ما تفحصه كويس و تتأكد انه مش مخبي وراه ضرر علي روحك
أو نفسك أو عيلتك أو عبادتك ..

النجاح اللي من ايد ربنا بس هو اللي تقبله..

و افتكر ان شجرة معرفة الخير و الشر اللي كانت شايلة الموت جواها
، و اللي اتعرضت علي آدم كانت "جيدة للاكل شهية للنظر و بهجة للعيون" (تكوين ٣ : ٦) ..