[souad jaalouk]

زوّادة اليوم: صلا لكل إيد بيضا

بيخبرو عن لحّام فات لعندو زلمي سألو قدّيش كيلو اللحمة؟ قلّو 18 000، هوّي و عندو فاتت مرا عالمحل سألتو نفس السؤال جاوبها 5000! عصّب الزلمي و صار بدّو يصرّخ انّو البياع عم يسرقو. اللحّام عملّو اشارة انّو يروق شوي. اخدت المرا اللحمة هيّي و عم تشكر الله انها رح تقدر تطعمي ولادها. بس فلّت قلّو اللحّام للزلمي هالست فقيرة كتير بتشتغل كل الجمعة لتقبض 20 000 و ما بتقبل حدا يساعدها ابدا، ما لقيت الّا هالطريقة ساعدها فيها إنّي قلها اسعار ارخص و رزقي و رزقها عا الله! اعتذر الرجّال من البيّاع و قلّو الله يكتر من امثالك بهالإيّام الصعبة...الزوّادة اليوم صلا لكل إيد بيضا ساعدت بأي طريقة و حسّت بصدق مع "اخوة يسوع، هؤلاء الصغار !"اللي بس حدا يعملّن شي كأنّو عملو ليسوع...الله يبارك خطواتكن و يكون مع الكل.