[walaa farouk]

خللي بالك من الدنيا .. مطحنة و دايرة تدق في الناس ، من غير ما تقف ..
هوا المطحنة من هواك و من رضاك ..
يعني مش ح تلفك و تجيبك تحتيها إلا بكيفك، و مش ح تسيبك تطلع منها إلا بكيفك ..

و العجيبة مطحنة الدنيا بتكسر عضمك و تهرس نفسك و انت مبسوط بالوجع ..
. مطحنة شغل تاخدك من اول يومك لاخره ججري و رمح و هري
و هرس لغاية ما توصل سريرك مدغدغ..

مطحنة تديك فلوس و عزوة ، لكن تاخد في وشها راحة بالك و نفسيتك الهادية
و صحتك و عافيتك و ضحكتك ، و تاخد في وشها عيلتك وولادك و اصحابك ..

مطحنة ما تعرفش توقفها لانها دوارة و مكلبشاك،
و كل ما تديك تبقي عاوز اكتر و تسيب نفسك بين سنانها اكتر تاكل راحتك و قلبك و نفسك ..

يا حسرة اللي ساب نفسه بيجرى ورا مطحنة ضله و مش لاحقه ..

و يا بخت اللي عرف يوقفها و يرضي و يشبع باللي عنده
و يقول لمطحنة الزمن العبي غيرها و اضحكي علي غيري
، راضي و متراضي باللي عندي ، و ح اخد من ايد ربي و اشكر و افرح ،
و اشتري بعيد عنك حياتي و راحة قلبي