[walaa farouk]

سيبه يكسب دور

جملة عبقرية بيقولها اجدادنا اثناء لعب الطاولة أو الدومينو ،
علشان ما يسيبش اللي قدامه حاسس بالهزيمة علي طول
و يفتح نفسه لللعب !! و كانوا يستضعفوا في دور و هم بيلعبوا مع اولادهم أو احفادهم،
و يضحكوا من قلبهم و هم سامعين كلمة "غلبتك يا جدو " ..

حكمة جميلة في الدنيا ، مش لازم تكسب علي طول، بالعكس فيه مرات
-بس بحكمة و خبرة- تحسس اللي قدامك انه كسبان
، أو انتم الاتنين كسبانين، علشان لو حسسته انه قليل قدامك ح يغير من نجاحك و يتعب و يتعبك!!

كلام جميل تعمله في علاقتك بالناس ، مع اصدقاءك او اولادك ..
ما تحسس حد انك كبير عليه أو فاهم عنه حتي لو دي حقيقة ..
ما تنورش كتير قدام الناس و تقعد احكي عن علاقاتك و انجازاتك و تفوقك ،
لتتعب عينيهم ، و تثير حقدهم عليك ..

افتكر ان يوسف الصديق كان ببساطة قلبه كان السبب في غيرة اخواته منه
بسبب قميصه الملون اللي كان يحب يلبسه دايما قدامهم ( من غير قصد و هو فرحان به)
، و كمان بسبب كتر كلامه عن الأحلام اللي كان بيشوف فيها الشمس
و القمر و الكواكب ساجدين ليه !! (تكوين ٣٧)..

و زمان اجدادنا علمونا "داري علي شمعتك تقيد " ..

طيب و آية "ليظهر نوركم قدام الناس" نوديها فين ؟؟
المقصود أن نورك يبان لوحده مش تعمله اعلان !! و لو ظهر نورك ده لوحده،
قل للناس ده نور ربنا اللي جاي من عنده " ..

و ده اللي اتعلمه يوسف لما كبر و نضج ووقف قدام فرعون يفسر له الاحلام

"فقال فرعون ليوسف: «حلمت حلما وليس من يعبره.
وأنا سمعت عنك قولا، إنك تسمع أحلاما لتعبرها».
فأجاب يوسف فرعون قائلا: «ليس لي. الله يجيب بسلامة فرعون». (تكوين ٤١) ..

الدرس : سيب غيرك ينور معاك ، أو حتي قبلك ، و سيبه يشعر بنجاحه ..
سيبه يفرح و يفرح قوي ..