[walaa farouk]

عيلة مكونة من ٤ أفراد: اب و ام اتنين اخوات و الأرض كلها ملكهم..

ارض و زرع و شجر و ثمر و غنم و بقر و خير و اتساع لا يحده البصر..
الدنيا كلها بتاعتهم، اتساع لا نهائى، و خير الأرض كلها ل ٤ بس..

مفيش أزمة سكن و لا مشاكل شغل و لا خناقة علي ركنة العربية (اقصد ركنة الدابة طبعا !!) ،

و لا خناقة علي ورث، و لا خلافات عائلية (مفيش زوجات لسه أصلا و لا سلايف و لا اهل بيتشاكلوا ) ..

وسط ده كله أخ (افتكر انه أخ ) قام قتل أخوه..

ليه؟
مفيش و لا سبب واحد ، ده حتي لو فيه سبب يتخانقوا، يزعقوا، يضربوا بعض
(و لو أن كل ده غلط و بالذات بين الاخوات) ..
السبب الوحيد أن قايين الكبير اتغاظ(تكوين ٤) من هابيل أخوه لان ربنا قبل تقدمته و ما قبلش بتاعته؟؟

ليه ؟
لان ربنا وصي نقدم التقدمة(الذبيحة ) من الغنم و هابيل سمع الكلام

، مش من ثمار الأرض زي ما قايين عمل و ما سمعش الكلام ..

الاغرب أن ربنا لنفسه لما لقي قايين اتغاظ حذره .. و الاغرب و الاعجب أن قايين ما سمعش و ذبح هابيل ..

و بين الناس دايما فيه قايين اللي بيكره، و يحقد و يحسد و يدبر المكايد

و يفضح و يشهر و ينتقد و ينتقم، و ممكن يقتل (مش ضرورى جسديا ) لكن نفسيا و معنويا ..

و ايه السبب ؟ مفيش اي تفسير لان هابيل كان بار حسب شهادة الكتاب

و قايين كان من الشرير (١ يوحنا ٣ : ١٢) ..

تتصور لسه فيه قايين؟؟
ما تستغربش أن من اول الكون كان فيه أخ بيقتل و من غير سبب

، و دلوقتي نفس الشر بيتكرر..

هو قايين بعينه اللي بيطلع لنا وسط كل خير و ينغص علي الناس عيشتها
بيدور ازاي ينكد علي اللي معاه بكلامه و تعليقاته، بيلف في طاحونة أذي ،
و ما بيهداش غير لما يتريق و يدمر و يعكنن علي حد ..

لو اتكلم يفيض مرار، و لو علق علي حد يبقي تحطيم و سخرية لاذعة
، لو اتوجد في مكان يبقي سيطرة و حب ظهور و كبر و انانية..

اوعي تبقي قايين ، لأنه ميت و بيموت حتي و هو موجود
"ملعون أنت من الأرض تائها وهاربا تكون في الأرض" (تكوين ٤ : ١١) ؛
و خليك هابيل لأنه بيعيش حتي و هو مش موجود "ان مات يتكلم بعد" (عبرانيين ١١ : ٤) ..

هابيل عمره ما مات و لا ح يموت