[souad jaalouk]

زوّادة اليوم: تفاصيل النهار
بيخبرو عن عيلة اتّفقو افرادها انّو كل واحد منّن يكتب عا ورقة تفاصيل نهارو و الإشيا اللي عملها. هالشي اجا نتيجة شكوى الكل انّو الأم عم تتأخّر بتلبية طلباتن: من ساعة قلتلّك بدّي آكل، صرلي ساعتين طالب فنجان قهوة، كل ما قلّك بدّي شي بتقوليلي يلّا شوي...بآخر النهار طلع البَي كاتب صفحة، الإبن اربع اسطر، البنت نص صفحة و الأم تلات صفحات! البَي و الصبي و البنت كاتبين مثلا: وعيت، اكلت، لبست، رحت عالشغل، رحت عالمدرسة، رحت عالجامعة، حكيت مع رفقاتي، عزمت اصحابي عالعشا، سمعت موسيقى...كلّن صار عندن الحشريّة يشوفو شو كتبت الأم! قِريو شوي و تفاجأو انها مش كاتبة شي عنها! كل اللي كاتبتو الُن هنّي مثلا: وعيت، حضّرت ترويقة لجوزي و الولاد، كويتلّن تيابن، حضّرتلّن زوّادتن، وصّلت الصَبي عالمدرسة، نضّفت البيت، حضّرت غدا لعيلتي...بشهر العدرا منصلّي لكل إم بكل عيلة ان كانت بيناتن او ملاك عم ينتبهلن من فوق...الله معكن