زوادة اليوم: نحنا اغنى من اولاد الصين
بيخبرو عن خادم رعيّة وصّى برعيتو وقال: «الأحد الجايي رح نجمع تبرّعات لَدعم ولاد الصين». يوم الأحد بيمرق صبي كتير فقير، وبيحِطّ بصندوق التبرّعات شويّة مصاري. بيسألو الكاهن: «من وين جِبِت هالمصريات يا إبني، لازم تخلّيها معك، ما إنت كمان فقير وبحاجة ت تعيش؟». جاوب الصبي: «أبونا أنا مبارح اشتغلت وجمّعت هالمصريات، الماما قالتلي نحنا أغنى من ولاد الصين، نحنا منعرف يسوع المسيح، هنّي ما بيعرفوه، ولازم نساعدُن حتّى يتعرّفو عليه».
الزوّادة بتقلّي وبتقلّك:
«الفقر الحقيقي هوّي إنّو نكون فقرا بالرب، والغنى الحقيقي هوّي إنّو نغتني فيه».