[walaa farouk]

في مشهد في فيلم Frida رغم إني شفت الفيلم مرة واحدة لكن المشهد ده مابنساهوش أبدا..

المشهد إن فريدا وحبيبها ديجو في اول مرة بياخدوا علاقتهم لمرحلة تانية، فريدا بحكم حالتها الصحية والحادثة البشعة اللي جرت لها كان جسمها فيه أثار خياطة وعمليات.. ف خافت لو شاف المنظر ده ينفر منها ف قبل أي حاجة قالتله "I have a scar" أنا عندي جرح.. وكشفت له عنه، كان رد فعل ديجو إنه دقق في أثر الخياطة ثواني وبعدين قالها "you're perfect" أنت مثالية. في اللحظات اللي بين كشفها للجرح ورد ديجو وش فريدا كان بيعبر عن قلبها اللي بيترعش من الخوف من رد الفعل السلبي، لكن لما الرد جه عكس توقعها فرحت زي الأطفال.

الفكرة إن كل حد فينا عنده مشكلة ما سواء جسدية فهتبقى ظاهرة أو نفسية فمش ظاهرة غير لو قرر يحكيها للي بيحبه لما بيطمن له وأكتر شيء بيسعد و بيحسس الواحد إنه له ضهر في الدنيا لما الحبيب اللي بيتكشف له السر ده بيطمنك برد فعل إيجابي..

وده اللي خلى فريدا تحب ديجو حب عمره ما قل لأنه حسسها إنه قبلها بحقيقتها بجروحها وتشوهاتها اللي هي كرهتها لكن هو مكرهاش.. عشان كدة كانت بتقول له "I love you more than my own skin" أنا باحبك أكتر من جلدي نفسه.