[walaa farouk]

(توبنى يارب فأتوب)

انا الخاطي وجاى اتوب
انا ندمان وكلى ذنوب
انا دايما احب انام
بشعور غالب مش مغلوب
انا السامريه وشبعانه
بمايه عالم مبترويش
انا العشار بجبروته
وفلوس العالم مبتغنيش
انا فى امانتى كنت شبيه
يهوذا فى سيرته وزيي مفيش
انا اللى لو سالونى بقول
انا بطرس معرفهوش ولا يعرفنيش
انا الفريسى من بره بياض
من جوه عفانه دود بيعيش
انا مابين الناس (مساويش)
انا اللى حكمت عليك وغسلت ايديا
وفاكر انى مش من دول اللى ظلموك
انا اللى جعلتك الجانى
وخليت اليهود صلبوك
انا اللى كنت فى يوم صلبك
فى وسط جنود قاموا وطعنوك
انا اللى مسكت بايدى السوط
انا واحد من اللى جلدوك
انا المسكين اللى ساب قصرك
ومشى مع ناس قرروا يبيعوك
انا الخاطى وجاى اتوب
انا ندمان وعايز اتوب
انا يارب محتاجلك
توبنى يارب فأتوب
انا اللى قلت احاكمها
وبين رجليا راح تنداس
بشريعه موسي ارجمها
من غير رحمه او احساس
انا اللى بسببك اتحررت
ونادوا ساعتها كل الناس
اصلب المسيا واطلق لنا باراباس
وانا الغرقان ف عتمه وتيه
انا مش عارف منفوخ ليه
انا مش عارف امتى هفوق
انا الخاطى وعايز اتوب
انا ندمان وكلى ذنوب
انا يارب محتاجلك
توبنى يارب فأتوب
تعالى وطهر من جوه
خطايا سنين
تعالى وادينى اراده
وخلينى من التايبين
تعالى لزانيه حولها
تبشر بيك امام ملايين
تعالى وقولى اتبعنى
تكون تلميذ وتشهدلى بكل يقين
تعالى وقولى انكارك انا نسيته
مشتاقلك وكلى حنين
تعالى لميت فى تابوت
ده انا خاطى ونفسى اتوب
انا ندمان وكلى ذنوب
انا يارب محتاجلك
توبنى يارب فاتوب