[Rena Jesus]

متحاولش تدخل في علاقة عاطفية و أنت مشرخ من جواك .... و تايه ...
و لسة مش عارف دهاليز نفسك من جوة ....
عالج نفسك .... و اعرف انت عاوز ايه ... و عايش ليه...
و ايه اللي بتحبه و ايه اللي بتكرهه ....
و ايه اللي بيوصلك لذروة غضبك و ايه اللمسة او الكلمة السحرية اللي بتخليك تهدى و تمتص كل غضبك ....

اتصالح مع ماضيك ..... او اردم عليه ... الطريقة اللي تريحك ....
سافر كتير عشان تعرف انت عاوز ايه بجد ... وسع دايرة اختياراتك ....
هتتفاجيء بحاجات كتير مكنتش تعرفها عن نفسك .....
متختارش من سلة المتاح لانه متاح .... وسع افقك ....
خد خبرة في الحياة من تجارب كتير ايا كانت نتيجتها .....

ادخل في المفرمة .... اصقل نفسك كويس ..... افهم نفسك .... حب عزلتك ..
اسمع صوت افكارك....سيبك من المفروض و اللازم ....
المفروض تعاسة ... و اللازم بيقتل حبك للحياة .. بيقتل المغامرة و الشغف .....
بعد ما تعمل كل ده ..... بعد ما تفهم نفسك كويسة و تقف على ارض صلبة .....
تقدر تدخل في اي علاقة عاطفية و تكون نسبة استمرارها عالية ....
لانك ببساطة قدرت تختار صح ...
لانك عارف بالظبط ايه اللي هيعجبك و ايه اللي هيشدك ....
و ايه اللي هيريحك .... و ايه اللي ممكن تقدمه للطرف المقابل ...
و اللي مش هتقدر تقدمه ..... مش هتفضل متخبط ....
و مش هتحتاج تقدم تنازلات باسم الحب ...
هتبقى حر .... و هتختار صح ... و هتحب صح ......
لا هتأذي نفسك ... ولا هتأذي شريكك .....

مفيش علاقة هتديك الأمان و الإكتفاء أساسها توهان و تخبط ....
العلاقات مش علاج نفسي للمتأزمين و قليلو الخبرة في الحياة ....
العلاقة راحة و شراكة و تكافؤ بين طرفين قرروا انهم فعلا مناسبين لبعض ....
بعد ما كل واحد فيهم عرف هوة عاوز ايه من حياته ....

cpd