[Rena Jesus]

كنت دايما بستغرب من اصحابي البنات لما نخرج و نكون بنهزر و نضحك
و اخر اليوم واحدة مثلا تكلمني و تديني الوش بتاع الاكتئاب
و تبدأ تحكيلي قد ايه اليومين دول في حياتها مش حلوين
و انها مضايقة من كل حاجة مع ان لسه كانت بتهزر مع الناس من شوية ..
و اللي كنت بستغربله اكتر ان و هي بتكلمني ساعات بشوف ليها comments على facebook عادي
و مش مكتئبة يعني ولا حاجة و كنت اضايق جدا
و اقول اشمعنا انا اخد الوش ده هي جت عليا يعني

بعد فترة بسيطة ربنا حب يفهمني كل الأسئله اللي كانت واكلة دماغي
و اني حكمت غلط و بقيت امر بفترة في حياتي مش حلوة و لما اخرج مع الناس بضحك و اهزر و ارجع بليل ادي الوش لصحبتي ...
و من هنا بدأت استوعب يعني ايه comfort zone بجد

الموضوع مش بس انك ترتاح لحد فا تتبسط معاه في خروجاته لأ
الموضوع انك مبتصدق تقلع الوش ال fake
مبتصدق توصل للشخص اللي هترمي عليه و انت مش خايف يسيبك في الهم و النكد لوحدك مهما كان الموضوع تافه او صعب
مبتصدق تسيب كل حاجة على طبيعيتها من غير ما تزيينها ولا تجملها للشخص ده
اوعى تضايق في يوم ان حد بيبينلك الوش ده و الجانب ده من نفسه
لأن معظم الوقت بنبقى احنا comfort zone لحد و احنا مش حاسين