[Rena Jesus]

- في اتنين كانوا صحاب اوي بس واحدة منهم كانت دايما شايلة المسئولية اكتر من التانية ..
البنت اللي كانت شايلة المسئولية دي كانت بتقول " انا فضلت استحمل كل حاجة لوحدي و احل مشاكلها و مشاكلي لوحدي و التمسلها الاعذار طول الوقت لدرجة اني جيت في الاخر حسيت اني مصاحبة نفسي .. انها مش موجودة و مالهاش اي دور ف حياتي " ..


- كان فى حد أخته كانت زعلانة اوي ان هي بقت شايلة المسئولية كلها لوحدها و ان جوزها " هنداوي " مبقاش بيساعدها في حاجة ..
قالها " انتي ساهمتي في خروج هنداوي من الحياة الزوجية لانك بدل ما تقفي جنبه وقفتي قدامه .. و بدل ما تشيلي معاه شيلتي عنه .. عملتي كل حاجة صح بشكل متطرف " ..

- بابا قالي قبل كدة ان كل واحد في بيتنا لي دور و عليه مسئولية ..
مينفعش حد فينا يقول انا مالي و يرمي مسئولياته علي حد تاني من البيت ..

- واحد كان بيتكلم عن العلاقات بشكل عام و بيقول ان ناس كتير بتنفصل و بيفشلوا ف انهم يكملوا مع بعض بسبب ان حد من الطرفين نسي دوره ..
و بالتالي واحد بس فيهم بقي بيقوم بدور الراجل و الست مع بعض .. والطرف التاني مبقاش لي دور ..

- في كتاب " Men Are from Mars, Women Are from Venus "
كان في جملة بتقول :
" If I seek to fulfill my own needs at the expense of my partner, we are sure to experience unhappiness, resentment, and conflict. The secret of forming a successful relationship is for both partners to win. "
ساعات كتير بيبقي جوانا طاقة ايجابية كبيرة و حماس و نحس اننا مستعدين نعمل اي حاجة عشان نساعد حد بنحبه و قريب مننا ..
ف نبدأ نشيل عنه جزء من مسئولياته .. بعد شوية نشيل جزء تاني ..
لحد ما نكتشف اننا شيلنا كل حاجة لوحدنا
و اننا بدل ما نشيل معاه شيلنا عنه ..
و بدل ما نساعده يبقي اقوي لغينا شخصيته و دوره ..

معظم العلاقات اللي بتستمر لفترة طويلة بيبقي سببها ان كل طرف في العلاقة دي سواء كانت صداقة او جواز ..
عارف ايه واجباته و ايه حقوقه ..
الراجل عارف دوره ايه و مراته دورها ايه و مفيش حد فيهم بيحاول يحمل التاني فوق طاقته ..
او يسيبه يشيل المسئولية لوحده ولا في حد منهم بيقول جملة " اصل انت راجل ف طبيعي تستحمل .. او انتي ست المفروض تصبري اكتر " ..

ساعات كمان بننسي اننا بنكمل بعض ..
واننا لينا حقوق و من كتر حبنا في الطرف التاني بنبقي خايفين نتعبه ف نفضل نشيل عنه كتيير لحد ما احنا كمان نتعب ..
نفقد القدرة علي اننا نكمل لوحدنا
و نندم اننا من الاول شيلنا عنه ماشيلناش معاه ..

الحقيقة ان العلاقات الانسانية دي حاجة معقدة جدا ..
بتحتاج مننا ان كل شوية نفكر نفسنا باللي المفروض نعمله و اللي المفروض الطرف التاني يعمله ..
بنبقي محتاجين نقتنع ان صداقتنا دي مشاركة .. جوازنا كمان مشاركة ..
و نتحكم ف مشاعرنا شوية لان كتير بيبقي قصدنا نساعد اللي بنحبه بس نكتشف اننا بنضره ..
واننا لغينا دوره و بقينا نقوم بدوره و دورنا ف نفس الوقت و طبيعي بعد فترة نتعب و نفشل
لان تحمل مسئولياتنا و مسئوليات غيرنا حاجة اكبر من قدراتنا كلنا كبني ادمين ..
ربنا خلقنا مختلفين عشان نكمل بعض و نشيل مع بعض مش عن بعض