[Rena Jesus]

ليه البنات بتحب الراجل اللي بيعيط ؟؟

هو الحقيقة مفيش اي اثبات علمي بيقول كدة بس السؤال كان في الاساس
( ايه رأي البنت في الراجل اللي بيعيط ؟؟ ) ..
لما ابتديت أدور علي النت كل اللي لاقيته أراء فردية من بنات عن الرجالة اللي بتعيط ..
ففي بنات شايفة ان الراجل اللي بيعيط ده انسان حساس و رقيق ،
و بنات تانية شايفة ان مينفعش راجل قوي يعيط ..
بس وسط الأراء ديه عجبتني جملة حلوة اوي من بنت ما بتقول
I don’t love it when men cry, but I love men who ..

الفكرة ببساطة مش أن العياط كسلوك في حد ذاته هو المطلوب ،
إنما اللي ورا سلوك العياط ده ..
العياط بالنسبة لأغلب الرجالة - كنظرة مجتمعية - حاجة غير مقبولة ،
يعني ايه راجل يعيط ؟! من و انتا صغير بتتربي ان العياط ده بتاع الستات ،
الراجل القوي ميعيطش ، و حاجات كتير تانية بتزرع جواك افكار مغلوطة ناحية العياط ..
مع انه علامة طبيعية جدا لتنفيس الانسان عن ضغط او تعب من خلال وصلة الغدة الدمعية بمناطق المشاعر في المخ ..
فلما الانسان سواء راجل او ست يبقي تحت ضغط ما بيبقي منطقي جدا انه يعيط ..

فالراجل لما بيعيط بيكون في اللحظة ديه انسان انسيابي في مشاعره ..
انسان محترم طبيعته الانسانية ..
إنسان عطوف مشاركش في كبت أحاسيسه او اخضعها بسبب قوالب مجتمعية غير منطقية او عقلانية ..
كل ده بيترجم عن فئة من البنات ان ده راجل جدير بالحب ..
فهو مش مكسوف من مشاعره او بيحاول يحرفها ..
مش خجلان من ضعف او تعب بيمر بيه انما بيعلن بشكل ما انه في حاجة لتواصل و احتواء ..
بيتبع سلوك ما لمجرد بس ان العياط ده بتاع الستات الكائنات الضعيفة !!!!
إنما هو زيها إنسان هي لها لحظات قوة و هو له لحظات ضعف ..


....فالفكرة فعلا مش راجل بيعيط .. أنما كل المطلوب راجل بيحس ..