[Rena Jesus]

شكراً يا جماعة عشان بسببكوا بقينا بنخاف من الزواج ونحس إنه محتاج اتنين خارقين عشان يبقوا مبسوطين !!

شكراً علي جملة : ( انتو لسه شوفتوا حاجة ؟ )
اللي بتتقال بعد كل خطوة مفروض إنها تفرح ..

بعد الخطوبة لما يلاقوا اتنين شكلهم مبسوطين ،
" انتو لسه شوفتوا حاجة ؟ الفترة دي بس حلوة بعدين هتشوفوا الويل "

شكراً عشان بسبب الجملة دي خلتونا مرعوبين ودايما بنفكر
( هو بجد اللي جاي صعب ومش هنقدر عليه ومش هنبقي مبسوطين ؟؟ ،،
طب هو احنا بجد حياتنا هتبقي وحشة ؟
،، طب وهنقابل الوحش في ليفل كام ؟ )

ليه ميبقاش كلامكوا
"والله الزواج حلو بس محتاج اختيار كويس وشوية صبر وتحمل مسئولية ،،
او بصراحة انا تجربتي في الزواج فاشلة بس في ناس كتير ناجحين
وانتو بإذن الله هتكونوا مثال كويس للأزواج السعداء
ليه ميبقاش الكلام كده ؟؟؟؟

شكراً عشان بتأكدوا لنا إن مفيش واحد بيعامل مراته باحترام وبيقدرها
وان كل الرجالة عندهم فكرة ان الراجل انسان كامل لا يقبل ان زوجته تعترض على افعاله او تقول لأ .. حتى لو معاها الحق .

شكراً عشان بتقنعونا ان مستحيل تبقي العلاقة بين الزوجة وحماتها كويسة ،،
لازم تبقي في مشاكل وكيد ومكر ،، ولازم تبقي حماتي مسودة عيشتي ..

شكراً عشان خلتونا نعرف ان الحب ده حاجة مش موجودة في الزواج ،،
ده بيبقي موجود في الخطوبة بس ونهايته مع بداية الزواج ،،
وإن أي زوجة مصرية لازم تكون نكدية ومظلومة وطماعة ومش بترضى ،
وأي راجل مصري مش بيعمل حاجة غير إنه يشخط ويزعق ويأمر وينهي كمان ..

شكراً انكوا بتعقدونا 💔..

اه الزواج مسئولية وفي مشاكل ،
بس ليه مبتقولوش المميزات زي ما بتقولوا العيوب ؟؟
زي ما بتقولوا العيوب قولوا المميزات او من فضلكم اسكتوا ..