[Rena Jesus]

خطوره العلاقات الاعتماديه

خلاص عشت دور الضحيه وفاكر اني معنديش رد عليك وان سكوتي ضعف او هزيمه
لا يا فندم

سكوتي لأَنِّي لو قلت لك الحقيقه اللي انا شيفاها هوجعك

سكوتي لأَنِّي عارفه انك عمرك ما هتشوف كلامي صح
وهتفضل تجادل وتناقش وتهري وتفتري وتكدب وتقلب الحقائق وتعيش الدور

سكوتي لأَنِّي بتكلم بالحق والعقل وانت هتفضل تجيب مبررات تفقع
وانا هيبقي عندي رد عليها كلها بس هدخل في كل الدوائر اللي فاتت

سكوتي عشان عارفه ان أخرت ده كله انك هتتاسف وتقول معلش
وانك انفعلت وانك بتحبني وإن ده من عشمك
وترجع تاني تيجي عليا ومتتحملش مسئولياتك
وتعمل نفسك ضحيه تاني وانا الجاني اللي مقدرتش أنقذك

سكوتي ده مش بيبقي مريحني

سكوتي بيبقي نار لأَنِّي عايز ارد وخايف من كل ده وساكت ومتحمل كل ده

سكوتي حاله فوران داخلي بحاول اللم الليله
واطبطب واكبر عشان اخرج من الدوامه دي

إنذار لكل ولاد الناس اللي في حياتهم أشخاص بتستغل أدبهم واحترامهم
وبيحاولوا يتخانقوا معاهم عشان يلفتوا انتباههم
او ياخدوا مصالح اكتر عن طريق انهم يحسسوهم بالذنب والتقصير
وأنهم هما اللي غلطانين وعشان انتو بتخافوا جدا تظلموا
او تجرحوا بتسمحولهم يعملوا فيكم كده
بس إنتوا عارفيين ان هيجي عليكم وقت تقلبوا عليهم وتقطعوا معاهم
وتهدوا كل اللي بنتوه

اقفوا بقي
ادوا الثقه لما تكون في محلها
اعتذروا عن الطلبات اللي مش قادرين عليها
وضحوا وجهه نظركم بقوه وثبات وصمموا عليها مهما حاولوا يبتذوكم عاطفيا
انتو كده مش بتعملوا فيهم خير
انتو كده بتعملوا فيهم شر
انكم بتخلوهم يعتمدوا عليكم وعلي غيركم
وميتحملوش مسئولياتهم ويبقوا أنانيين
وكمان شايفيين نفسهم مظلومين وضحايا

العلاقات دي اسمها العلاقات الاعتماديه
فيها شخص بيبقي بيدي طول الوقت
وشخص بياخد طول الوقت
العلاقات دي مهلكه للطرفين وزيها زي علاقه المدمن بالمخدرات
خدوا قرار دلوقتي أنكم تعملوا علاقات سويه فيها اخد وعطاء

الجدول اللي تحت بيوضح صفات كل شخص في العلاقه دي وآخر عمود شكل العلاقات السويه بيبقي ازاي
انت متستحقوش تبقوا مخدر
ولا صاحبك او زوجك او ابنك يستحق يبقي مدمن لعطائكم ومعتمد عليه
اقفوا وتفهموا أنكم زي ما بتئذوا نفسكم بتأذوه وعمره ما هيبطل ياخد