[walaa farouk]

من المواقف المؤثرة في الكتاب المقدس .. لما جابوا المرأة اللي مسكوها في ذات الفعل ليسوع علشان يقول كلمته الأخيرة!! بصراحة الست دي لو في زماننا دلوقتي مكانش حد هيرحمها!

بتخيل يعني شكلها كده وهي رايحه عند الرب يسوع، أكيد أكيد كانت متوقعة أنه هيقول موتوها " دي ست خاطية تستحق الموت " - حتى لو كان قال كده، كان هيبقى حقه، دي واحدة خالفت كل الوصايا!! "

ناس كتير بقت عايزة تخلص من حياتها لأنها شايفة انها خلاص مالهاش فايدة ولا قيمة.. فيه ناس تانية شايفه أنها بقالها سنين عايشة في الخطية وربنا مش راضي عنها!!

الكتاب المقدس ماليان بناس كانت خاطية وكل ما يسوع كان بيتقابل مع الناس دي كان بيغيرهم، لأنه بيحبهم.. كان في ناس منهم بتقبل وترجع وتتوب وناس تانية لأ .. بس على الأقل الفرصة كانت قدامهم ..

يهوذا لما سلم المسيح راح شنق نفسه!، وبطرس لما أنكره، رجع عيط وتاب والله سامحه، كل واحد بيشوف خطيته انها اصعب حاجة عملها في الحياة ومش ممكن ربنا هيسامحه عليها، الكلام ده مش حقيقي، الله بيسامح وبيغفر وبيدي حياة جديدة وقلب جديد كمان بس انت أطلبه..
الله مش هيقتحم حياتك أبدًا.. سابلك حرية الأختيار وأنت اللي بإيدك القرار.. هتختار ايه النهاردة؟