[Rena Jesus]

خطة ال٣٠ يوم لرفع قدرتك على التعايش مع الضغوط

كلنا عندنا مشاكل و ضغوط و ظروف.. صح؟
معظم الضغوط دي إحنا بنعملها بنفسنا.. ازاي؟ ..
بنضغط على بعض بسبب الضغوط!!
يعني كل واحد مضغوط يكشر و يجز على سنانه و يضغط على اللي ييجي في طريقه و هكذا..
دايرة لا تنتهي!

بص بسرعة حواليك في أي مكان حتلاقي ناس بتتعامل مع الضغوط بعصبية وقلق و تحفز اكتر ما تستاهل، و ده بيزود الضغوط و ينشرها ..
و حتلاقي في نفس المكان و نفس الظروف ناس تانيين بيتعاملوا معاها بروح ايجابية و مرونة و بساطة و ده بيقلل حجمها و شدتها..

مهم ان احنا نلاحظ ده و نفهمه علشان طريقة الاستجابة للضغوط بتعمل فرق كبير في نوع الحياة اللي بنعيشها النهاردة و في شكل الحياة اللي حنعيشها (ان شاء الله) بكره ..
عشان نعرف نعمل ده صح محتاجين شوية صيانة و شوية تطعيمات؛
صيانة من الاجهاد و الضغط العصبي و التلوث و تطعيمات ضد الانفجار و الانهيار و الانفطار و الانشطار (اللي هي الفلقة بالبلدي)

الصيانة بتيجي بالصلاة و بعد كدة بالرياضة و الكتابة و القراية و الهواية
و التطعيمات بتيجي برضه بالصلاة و بعدها بالتدريب على التحكم و التنفس و البساطة و التأمل و الصمت و السكون

اختار ٥ من الحاجات دي و اعملهم كل يوم لمدة ٣٠ يوم و انت مركز،
و لو محستش بفرق حارجعلك فلوسك ..

اخيراً ماتنساش..
لو عايز تقلل تأثير الضغط في حياتك بطل تحط انت ضغوط على الناس اللي حواليك ..
وكمان ساهم في تقليل الضغوط بالمساعدة و تبسيط الأمور والكلام الطيب.