عاوز الدنيا سهله؟..بتخنقك لو عصلجت معاك زياده في يوم؟
طب عمرك شفت حد وصل لحاجة مهمة أو مكان يستاهل من غير عكوسات و تعب؟
تفتكر المواقف اللي بنعدي فيها دي مجرد صدف و حظ و لا جزء من خطة كبيرة و حكمة كاملة و ليها أهداف و أسباب؟
الواضح من اللي حوالينا إن النجاح مش بيتكون من مجموعة تجارب سهله أو أيام متعة و ترف و تهييس،
لكن بيتكون نتيجة مقاومة و تحمل و سباحة عكس التيار و من غير عوامات،
و كمان اللي بيعوم ده بيبقى شايل على كتافه مبادئ مش ممكن يتحرك من غيرها!
إتحرك و إشتغل و إتعلم و إجتهد و إكتشف و بص على نفس الحاجات اللي حواليك بعيون جديدة مليانة حب استطلاع و تفاؤل و عزم ..
متدورش على سعادة سهله و بتلمع من بره مع انها فاضية من جوه..
النوع ده صحيح صوته عالي و ملون و بيشد العين بس بيحمض بسرعة و ريحته بتطلع و بتخنق
.. خلّي سعادتك في المغامرة و التحدي و اليقين و مساعدة الناس و التواصل مع الحياة بطريقة تزود متنقّصش..
و بعد كدة لما توصل اشكر ربنا على الوصول بشرف و عزة لنقطة انت اللي قطعت الرحلة ليها فبقيت بجد تستحقها
((ملحوظة قبل ماتمشي: إنت من حقك و تقدر تعيش سعيد النهاردة كده كده))