[marit jesus]

مش معني ان القطر ماشي ..ان الركاب دايما بخير
مش معني ان القطر ماشي ..ان الركاب مستمتعين
ممكن يكونوا رايحين عزا ..و شايلين جدا هم الوصول
ممكن يكون سفر ضروري ..و الوصول مؤلم كمان
مش معني ان علاقتك مستمرة ..انكوا تكونوا مناسبين
مش معني ان الشغل ماشي ..انه انسب شغل ليك من سنين
مش معني ان الحياة مستمرة ..ان التغيير مش ضروري جدا
مش معني انك الشعب ساكت ..انهم متأقلمين
مش معني ان الشعب كانن ..ان الامان للحاكمين
ممكن يكون الفم ساكت ..العقل دايخ ..و النفس عايشة في اكتئاب
ممكن تكون عمال بتكتم جوة نفسك ..و ييجي يوم تنفجر و تدمر كل حاجة حلوة كانت فاضلة جواك
ممكن تكون جوازتك مستمرة يجيلها اربع خمس سنين ..بس انتوا اصلا من جواكوا ..منفصلين !!
ممكن يكون القطر واقف ..و اللي راكب مستني يوصل السنبالاوين
ممكن يكون راجع بضهره ..و انت فاكر انه في تقدم مستمر
ممكن يكون النط حتمي ..وقتي ..قبل الكوارث و الحوادث
ممكن تكون راكب زهق ..و انت مش عارف رايح لفين
ممكن تكون تتمني حادثة من كتر ماحنا زهقانين
ممكن يكون كل اللي شاغلك ..النهاية و الوصول
ممكن تكون نايم طول الطريق ..و موصي كل اللي جنبك يصحيك عند الوصول ..
ممكن تكون من غير هدف ..و مستني السواق يحددلك هدف
اركب براحتك ..المهم تكون عارف رايح علي فين ..و عارف هاتقعد طول السكة بتعمل ايه ..و امتي عليك النزول ..و امتي عليك تنط حالا ..او تغير الاتجاه !!