منتدى الفرح المسيحى - الانحدار الي أعلى

https://upload.chjoy.com/uploads/167792433499711.jpg

كتير بنشوف حياتنا عمالة تنحدر وتنزلق طبقات لأسفل
شوية بسبب الأسعار اللي خلى كتير مننا ينزل طبقة إجتماعية
أو يمكن طبقات أقل
أو بسبب الخذلان اللي بنلاقيه في علاقاتنا كل يوم عن التاني
أو بسبب فقد حد عزيز وغالي ولأننا رافضين غيابه
فبنتمرد على حزننا ومش بندي له وقته وهيبته
وبنسلق مشاعرنا عشان الحياة لازم تستمر ومش هتوقف على حد

لكن ربنا نوّر عينيا على فكرة جديدة
ليه منكونش بننحدر لأعلى مش لأسفل!!
يعني نلملم شيلة الخذلان والفقد وشيلة الهم والضغوط ونرفعها لربنا فوق فبدل ما تاخدنا ونقع تحتها نكون بنديها له سبحانه وهو يتصرف!
بدل ما أبص في مرايتي على نفسي اللي مش لاقياها
وضاعت مني أبص عليه تعالى اسمه وأقوله كل اللي جوايا
أقرّب من الله
أفضفض له
أطلب حمايته ورعايته وحفظه وسلامه ليّ من خطر أي انزلاق أو انحدار
وأتأكد بيقين إيمان جوايا إن الطريق اللي أنا مش اده
هيمشيني فوقيه بكل شموخ وارتفاع