منتدى الفرح المسيحى

https://upload.chjoy.com/uploads/165116679216861.jpg

مهما حاولت مع الناس ، ح تكتشف الحقيقة الخالدة :
فيه ناس مش ح ترضي عنك و لو عملت لهم اللي ما يعمل !!

فيه ناس ناوية ما تحبكش (و حتي تكرهك ) من قبل ما تعاملك ..
الناس دي اصلا مش مرتاحة لا مع نفسها و لا مع حد من أساسه
، و مصنفاك مع الوحشين لانها مش قادرة تشوف حد كويس ..
يمكن مصدومة ، يمكن ماضيها مع الزمن كله جراح ،
يمكن نفسيتها سودا ، و جايز هي ضحية مرض نفسي او اضطراب شخصية مزمن ..

ناس تانية جاية تمشيك علي هواها ،
و يا تعمل لها اللي يرضيها يا بلاش
.. و اول ما يحدث أقل خلاف ،
تهين و تشهر و تغتاب و تشتم
و تقول فيك اللي اللسان يعف عن ذكره !!
الناس دي عاوزة دايما تطلع صح
، و تسوق اللي حواليها علي هواها ..
حتي في العلاج الطبي ، جاية تمشي الدكتور علي هواها
و تاخد الدوا اللي علي مزاجها و تبطل الدوا اللي مش عاوزاه ،
و في الآخر يبقي الطبيب هو اللي مش فاهم
لانه ما عملهاش اللي هى عاوزاه !!
و حتي في المشورة ، فيه ناس جايه "تسوق " الجلسة علي هواها
، و عاوزانا نقف في صفها و نطلع اللي قدامها غلط علي طول ،
و مش ناوية تعترف بغلطها ، و الا تقلب علينا "الترابيزة"
و تعادي الطببب و تشهر بسمعته و تشوه تاريخه !!

و فيه ناس تعتبرك "خدام عندها" ، وقت ما تطلب و تؤمر ،
لازم "تقف" و تضرب لها "تعظيم سلام"
، رغم انك بتعمل ليهم بكل حب و بدون اي مقابل ..

الناس دي بتعاملك علي انهم اشتروك ، وقتك ملكهم ،
و لازم تلبي لهم طلباتهم وقت ما هما يؤمروا،
و يزودوا عليك بلا حدود، لانك جزء من ممتلكاتهم، بلا مراعاة لخصوصياتك و حياتك ..

الناس "عجب" ، تتعالي عليهم يخافوا منك ،
تخدمهم يعايروك و يهينوك و يتقولوا عليك ..

و مع ذلك ، سنستمر نحب و نخدم و نحتمل
و نزود الحب و العطاء و الخدمة ..

و اللي ناوي يكمل في سياسة "حسنة و انا سيدك" ،
و سياسة "اديني و انا اشتمك" ح ننساه
و مش ح يخلينا نبطل حب الناس بلا اي مقابل!!