منتدى الفرح المسيحى

https://upload.chjoy.com/uploads/164980564820011.jpg

كل واحد زعله حتة من شخصيته و تكوينه و نشأته ..

فيه زعل الغضبان الثائر : ثورة و هجوم و عنف ، صوت عالي بس ، و بعدين ينزل علي مفيش، قلبه ابيض لس صوته عالي ..

و فيه زعل الغلاط: وقت الزعل "يطرطش زلط" ، ما بيحسبهاش: كلام قاسي و غلط و عنف لفظي ، و تطاول و خساير لكل الناس ..

و فيه زعل الحساسين : يزعل لجوه و يعيط لجوه ،
و يشيل في نفسه قوي ، و يقعد ساكت و ياخد جنب
.. و اول ما حد يراضيه بكلمتين حلوين ،
يتراضي و ترجع له ابتسامته ..

و فيه زعل المبتسمين : اللي عمره ما يبين زعله من كتر كرامته و عزة نفسه .. يداوي نفسه و يداديها، و يخبي وجعه ورا ضحكته ..
و ما يتكلمش الا لو حد حس بيه و سأله، و أصر انه يفتح قلبه و لسانه ..

و فيه زعل الاطفال : يكمل يزعل زي زمان ، يعند و يبطل ياكل
و يقفل علي نفسه و يتزرزر (يثور) ..

و فيه الزعل البسيط : واحد ما بيعرفش اصلا يزعل من كتر ما نيته بيضا..

كل واحد تعرفه لازم تعمله تحليل "الزعلوميتر" بتاعه علشان تفهمه ، و تتعامل مع زعله بطريقته ، و تكسبه ..

و اول ما نتيجة "التحليل" تطلع ، اوعي تلومه و تستهون بطريقته ..
لو سبته في زعله "بيموت" حرفيا و الزعل بيزيد و المرار يتضاعف و المسافات تبعد ..

علي قد طريقته اتعامل معاه .. اوعي ترد علي زعله بزعلك ، و تعند و تبعد ..
أفهمه و ادخل جواه ..
لان مرات حكمة تعاملك مع زعله تكسبه و تشفيه و تداوي جروح قديمة جواه هي اللي "شكلت" طريقة زعله اللي انت شايفها ..

تعامل مع زعل الناس من ارقي فنون الحياة ..