منتدى الفرح المسيحى - بنتى ضعيفة فى العربى والmath

بنتك قرفاكي...كبري دماغك

بنتك ضعيفة في العربي وال math ومحتاجه تشوفيلها حل
كبري دماغك مش بتعدي السنة خلاص (تربية مهملة)
-------------------------------------------

بنتك ضعيفة فى العربي وال math ومحتاجة تشوفيلها حل
عندك حق من هنا ورايح مفيش خروج ولا بريك وهتذاكر من أول ما ترجع من المدرسة لغاية ما تنام ولو اعترضت هتشوف هعمل فيها ايه (تربية متسلطة)
-------------------------------------------

بنتك ضعيفة فى العربي وال math ومحتاجة تشوفيلها حل
حبيبتي المذاكرة بتتعبها وبتوجع ايديها من هنا ورايح هعملها كل واجباتها بنفسي علشان متنقصش ولا درجة في أعمال السنه ودراجاتها تعلى (تربية متساهلة )
-------------------------------------------

بنتك ضعيفة فى العربي وال math ومحتاجة تشوفيلها حل
فعلاً ....كده محتاجه اقعد معاها وأشوف المشكله فين ونلاقى حل مناسب لقدراتها وظروفنا

وهزود وقت المذاكرة عندها ووقتي معاها في المذاكرة

على ما اعتقد ممكن نحتاج نغير طريقتنا في ال math لطريقه ملموسة وعملية أكتر لان نمط بنتي حسي

محتاجه كمان ناخد من وقت الشاشات نص ساعه ونزود بيه وقت القصص العربية لان عندها الحكي نقطة قوة وهتتعلم العربي به أسهل

وممكن أستعين بمدرس المادة يساعدني وأتابع معاه

(تسميها بقى تربية حازمه ، تربية إيجابيه ، تربية بنقاط القوة ، تعديل سلوك ، تربية متوازنه ، ذكية....الخ )

مش مهم المهم انك عرفتي ان التربية الصح لازم تجمع بين الحب والحزم مع بعض فى الموقف الواحد

يعني لا تدلعي زيادة ولا تشدي زيادة ولاتهملي وعاقبي من غير إهانة وأذيه

وبكده أتعلمنا بالأمثلة أن
للتربية 4 أنماط

1_تربية مهملة
2_تربية متسلطة
3_ تربية متساهلة
4_تربية حازمة