منتدى الفرح المسيحى - زعلك غالي قوي

https://upload.chjoy.com/uploads/164460189876631.jpg

زعلك غالي قوي

كلمة لازم تقولها لأي حد زعلان منك ، حتي لو زعله مش في محله ..

لا تبرر و لا تشرح و لا تترافع ؛ لان كده انت ما حسيتش بيه و لا قدرت مشاعره .

و بعد ما تطيب خاطره و تراضيه ، حط نفسك مكانه ح تلاقي انه ليه حق في زعله ، حتي لو انت مش قاصد خالص و اتصرفت بأحسن نية ..

و الزعل مرات بيكون "تجميعة" من حاجات منك قبل كده
و "اتكومت " في الوقت ده .

و مرات تانية كتير الزعل بيبقي من ناس تانية تعبوه ؛
و لانه مليان تعب ما لقاش غيرك يعبر معاه عن زعله "المخزون" ..

كمان الزعل مرات بيعبر عن حساسية صاحبه ، اللي شايل كتير علي كتافه، و محتاج بس حد يحس بيه ،
و مالقاش غير حبة زعل و وراهم حبة مصالحة يرطبوا خاطره ..

ممكن بعد ما تراضي حبايبك ، تؤكد محبتك و صدق نيتك و عدم قصدك ، و انه مش ممكن اكون باعمل كده الا بسلامة نية ..

لكن في كل ده افتكر المقولة الخالدة االي بتصفي اي مضايقة
"زعلك غالي قوي علي" ..