منتدى الفرح المسيحى - ينفع تسلفني ضحكة

https://upload.chjoy.com/uploads/164119854907921.jpg

ينفع تسلفني ضحكة

سلفهالي و خد اللي انت عاوزه ..

اضحك ضحكتين بس و لو دقيقة ، و بعدها خدهم تاني لو تحب ..

المهم شوف لي عندك كلمتين حلوين يرسموا البسمة علي قلبي ..
شجعني لو تقدر ، قولي كلام حلو ، ارمي الأمل جوايا، أقف جنبي لو ممكن، اسمعني كام دقيقة من غير ما تعلق او تنقد او حتي تنصح ..

قولي ان انا ممكن ابقي احسن ، قولي ان انا ح اقدر و اكبر و أنجح..

و علي فكرة مش لازم لما اطلب منك حاجة تعملها لي ، كفاية تحسن استقبالي و تحس بي و تبذل جهد حتي لو بس تسأل لي و تطمني و توجهني ..

و لما اجي لك بمشكلة، اقف جنبي لو تقدر، خفف عني ، رطب خاطري ، و قولي انها ممكن تتحل و ان ربنا يقدر يحولها لخير ..

و اسأل عليّ كل ما تقدر ، و لو بتليفون او برسالة، و مش لازم في الأعياد، كل ما تلاقي عندك كام دقيقة ..
خليني علي بالك و حسسني اني مش لوحدي في الدنيا و ان لي حد بيحبني من غير ما يطلب قدام كده اي مصلحة ..

سلفني كام ضحكة في دنيا ناسها نادر ما حد فاكر ان انا لسه موجود ..

"رسالة اسمعها كل يوم من قلوب جريحة"