منتدى الفرح المسيحى - ديوتريفس الذي يحب أن يكون الاول

https://upload.chjoy.com/uploads/163947823764121.jpg

ديوتريفس الذي يحب أن يكون الاول

كان موجود ايام يوحنا الحبيب : "
وَلكِنَّ دِيُوتْرِيفِسَ * الَّذِي يُحِبُّ أَنْ يَكُونَ الأَوَّلَ بَيْنَهُمْ *
لاَ يَقْبَلُنَا. (٣ يوحنا ١: ٩)

و في كل مكان تروحه حتي في بيت الله ح تلاقي "ديوتريفس" ..

ده عاشق الظهور ، محب الكراسي الاولي ..
و الغريب انه عادة بلا اي حضور ، و "مالوش طلة" ، و لا "قبول" ..
تلاقيه "فارض: نفسه و"فارد جناحاته" ،
بيتنطط زي فرقع لوز في كل حتة ، بكلامه و صوره اللي بينشرها، و "استلطافه" ..
يحب يصاحب المهمين لانه هو نفسه مش مهم ، فيدور علي اهميته في التقرب من اصحاب المواهب ..

و كتير تلاقيه بلا مواهب فعالة ، غير شوية الحركات اللي بيعملها ..

حتي في بيت الله تلاقيه متوفر ، بيشتغل "مطفشاتي" للناس ..
غيور و غيار ، و ما يستحملش حد يبان لا جنبه و لا قبله و لا بعده .
. ح يموت يقول رأيه، و يرفع صوته و يتحشر في كل حته ..
هو ناقص قوي ، و عنده شعور بالقلة معذبه و معذب بيه الناس ..

شخصية لو ما جتش بالنصح ، تحتاج حسم من اصحاب المسؤولية
، و حد يحجمه و يوقفه عند حده ، علي رأي الرسول يوحنا اللي عاني من سخريته و شرّه :"مِنْ أَجْلِ ذلِكَ، إِذَا جِئْتُ فَسَأُذَكِّرُهُ بِأَعْمَالِهِ الَّتِي يَعْمَلُهَا،
هَاذِرًا عَلَيْنَا بِأَقْوَال خَبِيثَةٍ (٣ يوحنا ١: ١٠)

و ربنا يحميك و يبعد عنك "ديوتريفس"
و يديك حكمة و قوة في التعامل معاه..