منتدى الفرح المسيحى - بتختار مين يارب

https://upload.chjoy.com/uploads/163645165079931.jpg

في مرة قعدت أفكر في الناس اللي المسيح
اختارها علشان تكون تلاميذه..
ولقيت إنهم تجميعة غريبة جداً،
مفيش شخص فيهم شبه التاني..
لقيت فيهم المندفع والمتسرع زي بطرس،
وفيهم العاطفي والحساس زي يوحنا،
وفيهم الشكاك زي توما،
وفيهم العقلاني والمتسائل زي فيلبُّس،
مفيش حد فيهم كان سوي نفسياً للآخر،
كل شخص كان عنده مشاكل وتحديات وعيوب في شخصيته.
لكن الملفت للنظر إن عيوبهم دي مكنتش مانع
قصاد المسيح إنه يختارهم للخدمة معاه،
الموضوع ده فرق معايا جداً بشكل شخصي..
لأني كنت دايماً بعتقد إن مشاكلي النفسية
هتقف عائق قصاد علاقتي بربنا..
لكن اكتشفت إن المسيح بيقبلنا زي ما إحنا،
وعنده استعداد إنه يطلع مننا
حاجات رائعة محدش فينا يتوقعها،
وده لأنه إلهنا هو إله كل نعمة
واتقال عنه في الكتاب المقدس..
"الْمُقِيمِ الْمِسْكِينَ مِنَ التُّرَابِ،
الرَّافِعِ الْبَائِسَ مِنَ الْمَزْبَلَةِ" (مز 113: 7).
خلي عندك ثقة إن مشاكلك النفسية
مش هتحرمك من وجود الله في حياتك.