منتدى الفرح المسيحى - شخصيات كتابية نتعلم منها ( هابيل الصديق )

https://upload.chjoy.com/uploads/163480995408331.jpg

هابيل الصديق
معنى اسمه نسمة او بخار وكانت حياته على الأرض زي النسمة
والبخار ظهر قليلا وعطر حياته بالفضيلة واختفى
هو الابن التاني لآدم وحواء بعد قايين اخوه
وكان بيشتغل في رعي الغنم وكان قايين مزارع
تعالوا نتعلم من هابيل الصديق
1- هابيل الراعي
هابيل اختار رعي الغنم ولما قدم ذبيحة قدم ذبيحة من أفضل ما عنده
طيب سؤال؟
ليه هابيل كان بيرعى غنم مع ان كان غير مسموح بأكل اللحوم؟
ده لأن هابيل تلقن الوصية والتقليد من أبوه عن الذبيحة والفداء
2- هابيل البار
الله قبل ذبيحته مش علشان هي ذبيحة لكن قبلها لأن اعماله كانت باره
زي ما ذكر في رسالة معلمنا يوحنا الأولى 3: 12
وذكر معلمنا بولس الرسول انه قدم أفضل ذبيحة في عبرانيين 11: 4
3- هابيل المحب
ايوة كان بيحب اخوه حتى لما اغتاظ قايين انه قدم ذبيحة وربنا ماقبلهاش
تكلم معاه في الحقل وفهمه ايه سبب رفض ذبيحته
لكن قايين قابل الحب بالبغضة والحقد ووصلت لحد القتل
4- دم الشهيد الصارخ للآن من الأرض
دم هابيل يصرخ من الأرض وإن مات يتكلم بعد
وده بيظهر ان الله لن يترك حق أولاده حتى بعد آلاف السنين
تعالوا نطبق اللي اتعلمناه
1- كن راعي في بيتك وفي كل مكان تخدم فيه
اهتم برعيتك لانها مطلوبة منك وتحاسب على كل واحد يضيع منك
2- تمسك ببرك وصلاحك حتى لو كل العالم فاسد
اهرب من الأدناس وحافظ على نقائك حتى لو قالوا عليك رجعي ومتخلف
3- كن محب للجميع وقدم النصيحة بمحبة للمخطئ
وعاتب برفق واكسب الكل بالمحبة
4- تذكر ان الله لن يترك حق أولاده لكن لا تحاول الانتقام
ولا تغير محبتك للبغضة والدعاء على عدوك بل صلي من أجله