لكل يوم زوّادة: يا ريت بترجع إيّام زمان

بيخبرو من زمان عن صاحب دكّان ختيار بيخبّي مفتاح الدكّان بمطرح قريب و مخبّر كل ولاد الضيعة وينو و بيقلّن اذا انا ما كنت هون و عزتو شي فُوتو خِدُو اللي بدكن ياه و حطّو المصاري بالجارور. هلّق في مدري كم قفل و كاميرات و أجهزة انذار، اكيد انّو الأيّام تغيّرت بس كمان الناس تغيّرت...بالمبدأ العام الثقة صار محلها الشكّ، الأمانة عم تخفّ شوي شوي، المشاركة و القناعة غطّوا عليهن المصلحة الشخصيّة و الأنانيّة...
الكلّ بيقولو يا ريت بترجع ايّام زمان كانت احلى و كانو الناس عايشين احسن، شو بتفرق ايّام زمان عن اليوم؟ نحنا اللي تغيّرنا...لكن مفتاح التغيير هوّي نحنا...هنّي كانو يحبّو بعضن و نحنا؟ هنّي كانو يوثَقو ببعضن و يوقفو حد بعضن و نحنا؟ هنّي كانو يساعدو بعضن و نحنا؟ هنّي كانو صادقين و نحنا؟ و الأهمّ....هنّي كانو يصلّو...و نحنا؟؟؟