منتدى الفرح المسيحى - كام مرة خرجتي برة نفسك عشان تسعدي حد

https://upload.chjoy.com/uploads/162844856827751.jpg

بنتي الصغيرة كل شوية تيجي تشتكي إن الكبيرة مش بتلعب معاها 😔 وكل مرة بأقوللها حاولي تلعبي مع نفسك وتلاقي طريقة تستمتعي باللعب حتى لو من غير أختك. 😮
الموضوع طول حبتين والشكوى كترت وكل مرة بنعيد ونزيد في نفس الكلام.
لقيتني بأنده البنت الكبيرة وبأتكلم معاها من منظور مختلف.
سألتها ليه مش بتلعبي مع أختك؟ ردت وقالت إن الصغيرة بتقترح ألعاب هي مش حاباها ومش بتتبسط فيها😏 سمعتها للآخر واستوعبت كلامها.
لكن كمان ربنا ألهمني أقوللها إن مش دايما مطلوب نعمل اللي بيبسطنا وبنستمتع بيه وبس لكن لأنك فرد من أفراد العيلة دي فمطلوب منك تتعلمي المشاركة وتدي من وقتك وانبساطك عشان تسعدي فرد تاني من العيلة.😍

وجه تفكير جوايا إن الانسحاب في زاوية ومكان راحة سهل قوي، إن الواحد لما يدور على حاجة تبسطه ويعتزل اللي مش بيبسطه ده سهل جدا لكن الأصعب إني أخرج برة دايرة نفسي وأدي من وقتي وانبساطي عشان أسعد طرف تاني.🥰

فكري كده وشاركينا كام مرة خرجتي برة نفسك عشان تسعدي حد؟ وهل فيه حواليكي ناس بتشاركك لمجرد إنها تسعدك؟