منتدى الفرح المسيحى - دفعت فواتيرك النهاردة ؟؟

https://upload.chjoy.com/uploads/162567907584131.jpg

فواتير، فواتير، فواتير كل يوم..

كهرباء و مياه و ايجارات و صيانات و اقساط و مشتريات و قروض و بطاقات ائتمان ..

و لو ما دفعتهاش اول بأول ، تتحول لديون مؤجلة تقطم وسطك و فلوسك و راحة بالك..

كده برضه فيه فواتير نفسية لو ما دفعتهاش تتكوم في عقلك و ضميرك و تجيب لك العيا و الهم و قلة النوم ..

اهمها فواتير الزعل و الخلافات و الشقاقات ، لو ما صفيتهاش اول بأول، تبقي كوابيس بالليل و زعل بالنهار ..

و صدقني حتي لو جيت علي نفسك شوية و اتفاهمت و ريحت اللي قدامك ، و وصلت لأي حل في النص ، ابرك الف مرة من نصرة مزيفة في خيالك عمرها ما ح تيجي..

مش ح ينوبك غير تكويم الفواتير النفسية اللي كده كده ح تدفعها .. و حتي لو كسبت معاركك مع الناس بعد سنين ، برضه انت اللي خسران عمر من الجرجرة و المطوحة و عدم الراحة ووجع القلب..

و يا بخت اللي اصلا مفيش بينه و بين الناس اي فواتير، و مش مديون لحد غير بالمحبة ..

و كمان يا بخت اللي اتعلم يسدد فواتيره النفسية كلها اول بأول، و يصفي زعله من بدرى بدرى، علشان ينام بالليل و هو مرتاح القلب و البال و الضمير ..