منتدى الفرح المسيحى - بياخد حقه شتيمة

https://upload.chjoy.com/uploads/162211838833381.jpg

فيه ناس بتعمل كده، بتاخد حقها شتيمة و اهانة و تشهير ..

طريقته انه يفضح اللي مضايقه و يهينه و ينشر إهانات له مسموعة او مقروءة ..

و ياتري كده الموضوع اتحل؟؟

شتيمته بترتد عليه هو ، و تقلل قيمته ، و تكره فيه الناس . ما حدش بيتعاطف مع الشتام ابو لسان اسود .. يمكن شوية يصدقوه ، بس بلا وعي و لا دليل..

اللي يصدق الشتام يبقي سمع من طرف واحد .. و بيكتشف بعد كده ان الشتام حاقد و كداب و قليل الاخلاق ، و ان اللي بيصدق واحد بيشتم اليوم بكره يلاقيه بيشتمه هو !!

الشتام لا يرث ملكوت الله لانه بيهين الإنسان المخلوق علي صورة الله ، و الكتاب حطه مع الاشرار في حزمة واحدة مع السكير و الحرامي و الطماع " وَلاَ سَارِقُونَ وَلاَ طَمَّاعُونَ وَلاَ سِكِّيرُونَ وَلاَ شَتَّامُونَ .. يَرِثُونَ مَلَكُوتَ اللهِ. (١ كورنثوس ٦: ١٠)

كمان الكتاب وصانا لا نرد عليه (علشان ما تديلوش قيمة) ، و لا نكمل عشرة معاه :
" إِنْ كَانَ أَحَدٌ مَدْعُوٌّ أَخًا زَانِيًا أَوْ طَمَّاعًا أَوْ عابد وثن أَوْ شَتَّامًا أَوْ سِكِّيرًا أَوْ خَاطِفًا، أَنْ لاَ تُخَالِطُوا وَلاَ تُؤَاكِلُوا مِثْلَ هذَا. (١ كورنثوس ٥: ١١)

خطية الشتيمة وصلت في حجمها امام الله الي عبادة الاوثان "الكفر" !!

الشتام تعبان يلدع الناس و بعدين يلدعك انت
دينونته من الله و امام الله ..

لو شتم لا تكلمه و لا تعبره و لا ترد عليه ، ابعد عنه بس و انت بتحبه ..

و ح تلاقي شتيمته ماتت قبله عند اقدام الحق الإلهي ..