لكل يوم زوّادة: ربنا بيفوت ع القلوب
بيخبرو عن شب بيعمل كل يوم قبل ما ينام جردة حساب. ييوم من الأيّام كان هالشب مريض و ما قدر يصوم. عشيّة قلّو يا رب بعتذر منّك كتير انّي ما قدرت صوم اليوم كان لازم آخد دوا.
قلّو الرب: مش انت ساعدت مرا ختيارة تطلع عالدرج؟ قلّو مبلا، جاوبو ربنا: يعني كنت صايم
قلّو الرب: مش انت عطيت السندويش تبعك اللي ما معك غيرو لطفل عالطريق؟ قلّو مبلا، جاوبو ربنا: يعني كنت صايم
قلّو الرب: مش انت انهِنت بالشغل كرمال شي انت ما عملتو و ما قلت شي و لا ردّيت بنفس الطريقة؟ قلّو مبلا، جاوبو ربنا: يعني كنت صايم
قلّو ربنا: مش انت جارك كبّلك زبالة بجنينتك و ما حكيتو شي و رحت لمّيتن للمرّة الألف؟ قلّو مبلا، قلّو يعني كنت صايم...
اخوتي الصوم مش بس عن الأكل، ربنا بيفوت عالقلوب و بيعرف النوايا و افعال المحبّة و الرحمة و انّك ما تردّ الإساءة بإساءة اكبر و انّك تتشارك القليل اللي عندك مع غيرك صوم بحد ذاتن!