منتدى الفرح المسيحى - ليه اللحمة مشغتة

https://upload.chjoy.com/uploads/161074247944571.jpg

ليه اللحمة مشغتة ؟؟
المثل الشعبي العبقري بيقول :"
ليه اللحمة مشغتة (مليانة شغت - يعني لحمة رديئة لا تؤكل) ؟؟ اصل الجزار قريبنا " !!
اشارة الي أن الاذي و الخداع بييجي اكتر حاجة من القرايب و الحبايب و المعارف!!
و علي رأي المثل الشهير "علمته الرماية فلما اشتد ساعده رماني" !!
المثل اكيد لا ينطبق علي الكل ، لأن فيه حبايب اكتر من ممتازين..
لكنه بيعبر ببراعة عن الواقع المؤلم !!
اكتر واحد اذي داود النبي ابنه ابشالوم اللي قسم المملكة و بقي عدوه
، و معاه مستشاره الشخصي اخيتوفل اللي انضم لابشالوم و بقي يشير عليه بأذي داود ، أبوه !!
كمان اكتر واحد تعب ابراهيم ابو الآباء ابن اخيه لوط، اللي رباه و كبره،
و لما بقي صاحب املاك (من خير عمه ابراهيم ) اختلف معاه ،
و اضطر ابراهيم علشان الخلاف ما يزيدش يقوله خد اللي يكفيك
و اختار المكان اللي يعجبك يعجبك و انفصل عني ..
قصة تاني عن شمشون اتكررت مرتين ، أن المرأة اللي يحبها (واحدة منهم اسمها دليلة)
هي اللي تكشف سره للاعداء و اتسببت في القبض عليه و خلع عينيه و سجنه ثم موته ..
كمان القصة الأشهر عن يهوذا تلميذ المسيح اللي خانه و باعه بالفضة و سلمه للموت ..
الدروس :
١-حب الناس و ثق فيهم بس علشان ما تتصدمش في حد ، حرّص و لا تخونش ..
٢-الثقة في الناس نعمة ، و الحرص و الاحتراس حكمة ..
٣-اوعي تخيب ظن حبايبك فيك .. اخدم الكل و احرص بالذات علي خدمة الأصدقاء و الاحباء و الأقرباء علشان لو اتصدموا فيك مش ح تعرف تعوضهم "اَلصَّدِيقُ يُحِبُّ فِي كُلِّ وَقْتٍ، أَمَّا الأَخُ فَلِلشِّدَّةِ يُولَدُ. (الأمثال ١٧: ١٧)