منتدى الفرح المسيحى - شايف قد ايه ربنا بيحب

https://upload.chjoy.com/uploads/160976516977751.jpg

كنت عارف المعلومات دي ؟؟

كنت تعرف ان الله احب هاجر "الجارية" المصرية الاممية، و ظهر لها في تكوين ١٦ و عزاها و شجعها و طمنها ، و بعدها ظهر لابراهيم أب الآباء "خليل الله" و حبيبه في تكوين ١٧ ، و شجعه و طمنه زي الجارية تمام ؟؟

شايف قد ايه الله بيحب ؟؟

كنت تعرف ان اول سفر في الكتاب المقدس مش التكوين ، ده كان عن أيوب الرجل العربي الاممي (قبل ابراهيم) اللي ربنا جربه بالألم و ضرب به اروع أمثلة الصبر و الاحتمال ، و ظهر له و قواه و رجع له كل اللي راح منه ، ووضع اسمه وسط مصاف الأنبياء و العظماء ؟؟

شايف قد ايه ربنا بيحب؟؟

كنت تعرف ان الله احب راعوث الموآبية الاممية لدرجة انه أفرد لها سفر كامل باسمها ، و لدرجة انه خلاها تبقي جدة داود و بالتالي جدة السيد المسيح ؟؟

شايف قد ايه الله بيحب ؟؟

كنت تعرف ان الله من حبه لمدينة نينوي و شعبها الوثني ، أرسل لهم نبي خاص "يونان" لينادي لهم بالتوبة، و انه سخر الحوت ليضعه في جوفه ليجبره يروح لهم ، و انه وبخه كل التوبيخ لأنه كان رافض انه يروح لشعب وثني لا يعرف الله و لا الحق و لا الأخلاق ؟؟

شايف قد ايه ربنا بيحب ؟؟

كنت تعرف ان في أنساب السيد المسيح مكتوب اسم ٣ زانيات تابوا و ربنا غفر لهم و اكرمهم و من شدة اكرامه لهم وضعهم في سلسلة الانساب في متي ١ (ثامار و راحاب و بثشبع ) ؟؟

شايف قد ايه ربنا بيحب؟؟

اطمن : فيه اله عظيم بيحبك .. هو تبارك اسمه اللي اعطي و مازال بيعطي كل الحب و السماح و الأبوة الالهية دي لأقل الناس كرامة و مكانة و ضعف ..